EDITORYAL - Lifestyle check
Lifestyle check sa mga sakop sa kapolisan sa nasud tungod sa kadaghan na sa mga krimen nga gikalambigitan sa mga aktibong polis. Daghan na man gud karong mga polis nga kalit lang midato ug wala motukma ang ilang ranggo sa ilang kwarta ug lifestyle.
Usa kini ka panawagan gikan ni Department of Interior and Local Government Secretary Mar Roxas nga miuna na pagpaubos sa lifestyle check bisan walay mireklamo o nanawagan alang niini.
Kung usa kini ka political trick alang sa umaabot nga 2016 Elections, maayo kini nga bulatik kay maayo man ang katuyoan niini ug bahala na ang publiko paghukom kung unsaon nila pagsabot ang pagpaubos ni Roxas sa lifestyle check. Siguro angay pud apilon ang ubang miyembro sa kabinete.
Didto sa kaulohan nauso kaayo ang maong modus sa mga badlungong polis sama sa pagpanakop sa mga gidudahan apan dili kaayo baniog nga bigtime drug pushers ug pagkahuman ilibot-libot lang sa siyudad aron 'modugo' ug paglabay sa pipila ka oras buhian kun makahatag na sa gipangayong kwarta.
Sa gidaghanon karon sa mga polis, dili mahurot og paubos ang tanan sa lifestyle check, mas maayong ang taga laing ahensya sa gobiyerno maoy mohimo sa imbestigasyon sama sa Department of Justice o ba kaha Bureau of Internal Revenue.
Angay pud apilon ang uban pang law enforcement units nga dunay kapasidad pagpanakop kay nauso na karon ang 'hulidap' ilabi na sa mga kaso sa illegal drugs.
Mas labing maayo kung ang Philippine Drug Enforcement Agency maoy mo-lifestyle check sa National Bureau of Investigation samtang ang naulahi maoy mohimo og lifestyle check sa Philippine National Police, aron ning paagiha dili magbinawsanay ang maong mga law enforcement units.
- Latest