Unsay kuwang sa SONA?

Niabot og halos duha ka oras ang State of the Nation Address ni Presidente Noynoy Aquino.

Kuwang ra gani kini kun nagpaabot ka nga iyang ibutyag ang tanang aspeto sa atong pagka-nasud ubos sa iyang pamunoan.

Apan alang sa usa ka presidente nga nahibawo ‘tang daan nga mo-ubo ug mag-uga ang tutonlan tungod sa iyang pagsige og panigarilyo?, medyo taas ra ang maong diskurso.

Daghan ang nisubay sa mga unod sa iyang pamahayag. Daghan ang natagbaw ug daghan ‘sab ang nadismaya.

Wa’ ko makakita sa iyang SONA. Gituyo nako nga dili motan-aw ug gipili nga matu’g og sayo niadtong maong adlaw. Wala kini magpasabot nga nawagtangan ko sa kaikag apan gipilde lang g’yud ko sa akong kakapoy.

Dili sama kaniadto sa mga SONA nila’ng kanhi presidente Cory Aquino ug Fidel Ramos nga kun masipyat ka sa pagpaminaw, posibleng wala na g’yud kay kahigayonan nga makapaminaw pagbalik.

Salamat sa bag-ong teknolohiya, dili pa uwahi ang tanan aron tan-awon ug balik-balikon sa pagtan-aw ang usa ka pasundayag sama sa SONA ni Presidente Aquino.

Apan kun namungingi sa daghang numero ang SONA nga nagpasabot og mga ebidensya sa mga karsada nga napaayo, mga tulay nga napatukod, mga classroom nga napabarog, mga trabaho nga nabuksan, mga scholarship nga naapud-apod, adunay mga punto nga nagkuwang ang presidente sa iyang report sa katawhan.

Dili ang Freedom of Information kon FOI nga wala maapil sa iyang diskurso. Apan napakyas ang presidente pagbutyag kinsa ang tukma nga tawo nga mosunod sa iyang pamunoan.

Sa usa ka liderato nga nakaangkon gihapon og taas ug positibo’ng pagsalig sa katawhan, bisan niini’ng ika-upat ka tuig sa iyang katungdanan, mahinungdanon alang nato nga mahibawo kun kinsa ang gusto niya nga pasundon sa iyang tahas.

Kun tataw lang karon kinsa ang manok sa Malacañang nga maoy mosunod ni PNoy, mas mahatagan ‘ta og igong panahon sa pagtimbang-timbang kun tukma ba o dili ang maong tawo nga mosunod sa mga nahimo ni Aquino. Apan samtang hanap pa ang tanan, maka-kwestyon ‘ta kinsa ang iyang ituboy sa katungdanan. Sa usa ka nasud nga nahimo nang kinaham nga sumsoman ang politika, apan mas maayong karon pa lang mahibaw-an nang daan kang kinsa isalig ni PNoy ang iyang mga maayong nabuhat sa nasud.

Ug samtang nagpaabot ang tanan sa mga mosunod nga buwan sa iyang pamunoan, masayod na unta ‘tang daan kun may kapasidad ba o wa’, may katakos ba o wa’ ug kasaligan ba o dili ang mosunod sa mga tunob ni PNoy.