Estudyante taga Brgy. Luz mahimong di mag-uniporme

CEBU, Philippines - Tungod sa nahitabong sunog gitugotan ni Cebu City Schools Division Supt. Dr. Rhea Mar Angtud ang mga tinun-an sa Barrio Luz Elementary School ug Barrio Luz High School nga makatungha nga dili mag-uniporme inig bukas sa klase karong Hunyo.

Matud pa ni Angtud sa Banat News nga kinahanglang hatagan og igong panahon ang mga tinun-an aron makapangita og uniporme tungod sa nahitabo.

Dugang pa niya nga dili angayan mabalaka ang mga tinun-an kinsa ang ilang mga report card naapil pagkasunog sanglit maka-enrol gihapon sila.

Ang prinsipal sa tunghaan maka-isyu og certification aron ma-enrol ang mga bata. Nasayran nga moabot ngadto sa 158 ka mga bata sa elementarya ug 47 ka mga tinun-an sa sekondarya ang naapektohan sa sunog sa Barangay Luz.

Bisan pa man sa trahedya nga nasinati sa Barrio Luz, nagmalaumon si Angtud nga duna gihapoy kusog ang mga ginikanan sa pagpatungha sa ilang mga anak sanglit mao kini ang usa sa mga instrumento sa ilang kalampusan.  

Mapasalamaton usab si Angtud sa mga ginikanan sa bata, mga opisyales sa Barangay Luz ug uban pa nga volunteers nga mitabang sa pag-panglimpiyo sa mga lawak isip parte sa Brigada Eskwela. (BANATNEWS)