Banat ( Leaderboard Top ), pagematch: 1, sectionmatch: 1

Ex-con gipusil, bata napagan

CEBU, Philippines - Usa ka ex-convict ang gisuwayan pagtipi sa wala mailhing tawo apan usa ka grade 5 nga tinun-an ang napagan sa pagpamusil pasado alas-3 sa kaadlawon kagahapon diha sa sitio Lawis barangay Pasil ning dakbayan.

Ang biktima nailhan nga si Robert Herquillo,36, molupyo sa maong lugar samtang ang napagan sa maong pagpamusil mao ang grade 5 nga 13-anyos nga lalaki.

Ang mamumuno gihulagway nga nagpangidaron og 30-anyos, 5'6 ang gitas-on ug nagsul-ob og puti nga t-shirt kinsa daling mi-eskapo human sa pagpamusil.

Sa pakighinabi sa Banat News ni SPO1 Ruth Violango sa Homicide Section sa Cebu City Police Office mibutyag kini base usab sa alegasyon ni Herquillo nangita siya sa iyang manghod nianang tungora dihang nabantayan niini ang maong mamumuno nga naglingkod ug sa paglabay niya miduol kini ug mipusil kaniya.

Sumala pa ni Violango si Herquillo daling mikaratil og dagan apan gigukod kini sa maong lalaki kinsa padayon ang pagpamusil hangtud nga naigo ang walang bahin sa nawong ug tuong bahin sa lawas ni Herquillo.

Apan gawas kang Herquillo napagan sa sampot ang usa ka 13-anyos nga batang lalaki nga natulog sa usa ka lantay sa nahisgutang lugar.

Ang maong bata daling gidala sa Visayas Community Hospital samtang si Herquillo gidala sa Cebu City Medical Center.

Nakuha usab sa crime scene ang kabhang sa kalibre .45 nga gituohang gikan sa armas sa mamumuno.

Matud pa ni Violango nga adunay posibilidad nga ilegal nga drugas ang hinungdan sa maong pagpamusil.

Dugang pa ni Violango nga base sa impormasyong ilang nakuha, si Herquillo napriso niadtong tuig 1995 ug nakagawas kini tuig 2003 tungod sa kaso sa ilegal nga drugas. (BANATNEWS)

  • Follow Us: