PNP naangin lang sa AFP-Ontog

CEBU, Philippines - Giklaro ni PRO-7 Chief Supt. Ager Ontog nga naangin lang ang Philippine National Police (PNP) sa pasangil nga maoy ikaduhang kurakot nga ahensya sa gobiyerno sa nasud.

Kini subay sa labing ulahing survey nga gipagawas sa Pulse Asia nga gibase sa nagpadayong senate hearing bahin sa ‘Pabaon Isyu’ sa mga miretirong opisyal sa Armed Forces of the Philippines (AFP), ang numero unong kurakot nga ahensya sa gobiyerno.

Kini maoy giluwatang reaksyon ni Ontog kagahapon atol sa Talakayan sa Isyung Pulis (Tsip) Forum sa media center sa PRO-7. Apan bisan paman niini, nagkanayon si Ontog nga ilang giisip nga usa ka dakong hagit sa ilang organisasyon ang migawas nga survey sa Pulse Asia ug mipasalig nga ‘transparent’ ang ilahang pagpagawas og pundo sa rehiyonal nila nga buhatan ngadto sa tanang police station sa kinatibuk-ang Central Visayas. “While it really affect as they should not take it as discouraging rather, as a challenge to improve our processes and procedures so that the citizenry will consider as an agency with integrity that delivers services to the people,” matud pang Ontog.

Midugang si Ontog nga matag buwan aduna silay kapin sa P8 milyones nga budget ug iya kining gibahin-bahin sa matag polilce station sa Central Visayas lakip na ang Sugbo.

Matud ni Ontog nga P17 mil ngadto sa P18 mil ang ilang mahatag nga budget sa matag police station alang sa maintenance sa ilang buhatan.

Giangkon niini nga ang kaping P8 milyones dili gyud kaigo ang maong pundo hinungdan nga dili nalang kaayo siya mobisita sa mga police station sa tibuok Central Visayas tungod kay gasto.Apan nagtuo si Ontog nga karung sunod tuig madugangan na ang ilang budget alang sa kapulisan sa tibuok Central Visayas.

Sa iyang bahin si Sr. Supt. Mariano Natuel, hepe sa Police Community Relation (PCR) sa PRO-7 mitataw nga pipila ka tuig ang nakalabay ang PNP anaa sa ikalima nga ahensya sa gobiyerno nga kurakot.   - BANAT NEWS