Banat ( Leaderboard Top ), pagematch: 1, sectionmatch: 1

P350 mil danyos sa duplex nga nasunog

CEBU, Philippines - Mikabat og P350 mil ang gibana-banang danyos sa sunog nga miugdaw sa usa ka duplex nga balay sa dalan F. Llamas sa barangay Punta Princesa, siyudad sa Sugbo kagahapon sa kaadlawon.

Ang alarma sa sunog sa duplex house ni Jojie Rama nadawat sa kabomberohan alas 4:28 sa kaadlawon ug kontrolado na ang kayo human sa 7 minutos.

Si SFO1 Nilo Daculan, imbestigador sa Cebu City Fire Department mitug-an sa mga tigbalita nga nagsugod ang sunog sa Door no. 1 nga gipuy-an sa usa ka Roger Alegarbis.

Matud ni Leonisa Urot, katabang ni Alegarbis nga samtang siya nagluto kagahapon sa kaadlawon sa ubos nga bahin sa balay iyang nabantayan nga nagpiti-piti ang linya sa koryente hinungdan nga iyang gidali pagpawong ang suga ug nagpadayon siya pagluto.

Apan matud ni Urot nga pagka taud-taod iyang namatikdan nga midako ang kayo busa gipukaw dayon niya ang iyang amo. Matud ni Daculan nga tungod sa pamahayag sa katabang ni Alegarbis dako ilang pagduda nga kuryente ang hinungdan sa maong sunog.

Midugang siya nga nasalbar ang silingang panimalay sa maong duplex house tungod sa fire wall niini, ug maayo nalang kay wala usay nabiktimang kinabuhi sa maong sunog.   (BANAT NEWS)

  • Follow Us: