Giselosan gipusil angol

CEBU, Philippines - Usa ka ulitawo gipusil sa iyang barkada nga nagselos kaniya samtang siya naligo sa atabay didto sa Sitio Bonbon barangay Catarman lungsod sa Liloan sa miaging gabii.

Ang biktima mao si John Harrison Sabanal, 21, ulitawo, molupyo sa maong lugar, samtang ang suspek mao ang iyang silingan nga si Kenneth Vilacarlos, 23.

Si PO1 Ronald Russello sa Liloan Police Station mibutyag sa Banat News nga ang biktima naligo sa atabay dili layo sa ilang balay dihang giluthang kini sa suspetsado.          

Gumikan kay namubo siya og tubig sa iyang lawas sa pagbuto sa armas wala dayon siya kamatikod nga naigo siya, apan human sa pipila ka gutlo, nakasinggit na kini sa kasakit kay samdan sa bala ang iyang bukobuko.

Daling gihatud ang biktima ngadto sa Vicente Sotto Memorial Medical Center (VSMMC) samtang ang suspek nga misibat unta dayon human makapusil, nadakpan usab sa mga tanod nga maoy mipabalhog niini sa prisohan sa kapolisan.

Ang amahan sa biktima mitug-an sa kapolisan nga nagselos ang suspek ngadto sa biktima tungod sa pagtuo nga ang kapuyo niini (suspek) adunay relasyon sa iyang anak. - BANAT NEWS