Balili lot butanga'g solar power

CEBU, Philippines - Miduol kang Gob. Gwendolyn Garcia ang usa ka dakong opisyal sa solar power producer aron pagtukod og solar power energy dinhi sa lalawigan sa Sugbo.

Si Paul Rodriguez ang presidente ug Chief Executive Officer (CEO) sa ASEA One Power Corporation, usa ka renewable energy power producer nga nakabase sa nasud sa China, ang nagpakitabang ni Garcia alang sa ilang pagatukuron nga solar power energy dinhi sa probinsiya.

Matud pa ni Rodriguez nangayo siya og dili muminus sa 10 ka ektaryang luna aron tukuran sa ilang 5 megawatt nga solar power energy alang sa mga Sugbuanon.

Sigon pa ni Rodriguez nga ang iyang labaw nga opisyal sa ilang kompanya nga nakabase sa China gustong makabutang og solar power energy dinhi sa nasud sa Pilipinas sa labing daling panahon tungod kay ang solar power energy mao man ang ikalima sa labing dako nga tinubdan sa supply sa kuryente sa nasud sa China.

Si Rodriguez misugyot sa iyang mga labaw nga tukoron ang maong proyekto didto sa Palawan. Apan nakahunahuna si Rodriguez sa Sugbo nga nanginahanglan og dugang supply sa kuryente hinungdan nga dinhi na sa Sugbo niya ipatuman ang maong proyekto.

Si Garcia wala na magduhaduha pa sa paghatag og suporta sa maong proyekto tungod usab sa giatubang nga problema sa Sugbu sa enerhiya.

Si Garcia mitanyag og napulo ka ektaryang luna sa Balili property sa Tinaan, Naga sa habagatan nga bahin sa lalawigan ug sa lungsod sa Carmen alang sa amihanang bahin sa lalawigan sa Sugbo.

Matud pa sa gobernadora nga nakagusto siya sa maong plano sanglit ang usa sa iyang prayoridad karon sa iyang pangagamhanan mao ang pagsulbad sa problema sa power shortage ilabi na nga usa kini ka renewable source of energy nga maoy gipunayan og pamugos sa mga environmentalist.

Samtang si Rodriguez miingon nga maayo kaayo ang gitanyag sa gobernadora nga luna sa Balili sanglit mahimo mang katamnan ang yuta nga tukuran sa mga kahimanan sa solar power.

Dugang pa ni Rodriguez nga usa ka panagtambayayong ang maong proyekto tungod ang Kapitolyo maoy mohatag og luna samtang ang iyang kompanya, ASEA One Power Corporation, maoy moinstalar sa mga ekipo alang sa solar power energy. (BANAT NEWS)