Driver nga pusher nasikop

CEBU, Philippines - Nasikop sa buy bust operation sa kapolisan ang usa ka drayber sa habal- habal nga gihulagway nga big time pusher og marijuana sa lungsod sa Dalaguete sa miaging buntag.

Ang nadakpan mao si Renante Vergara Alonzo, 42, minyo, nga taga barangay Panaguikan, sa maong lungsod. 

Mikabat og ¼ kilo nga marijuana ang nasakmit gikan sa suspek uban sa duha ka tag P500 nga marked money.

Si PO2 Noeh Rosales sa Dalaguete Police Station mibutyag sa Banat News nga ang pagkasikop sa suspek nahimo human sa pipila ka buwan nilang surveillance kon pagpaniid sa negosyo niini.

Nasayran usab sa kapolisan nga adunay mga suki ang suspek nga mga Ilonggo nga mopalit kaniya og 6 ngadto sa 8 kilos.

Matud ni PO2 Rosales nga kini maoy hinungdan nga gilusad nila ang buy bust operation. Nasayran nga pinaagi sa police asset nga usa ka civilian, dali kaayong nakahatod og ¼ kilo nga pinaugang dahon sa marijuana ang suspek ngadto sa nagpaka-aron ingnong pumapalit nga sinugo sa polis.

Human itunol sa suspek ang marijuana ngadto sa police asset, gitunol usab dayon sa naulahi ang duha ka tag P500 nga minarkahang salapi ngadto sa suspek.

Unya kalit lang mihugpa ang kapolisan aron pagposas sa suspetsado ug gipaslak dayon kini sa prisohan aron paabuton ang tukmang kaso nga angayang isang-at batok kaniya. (BANAT NEWS)