Banat ( Leaderboard Top ), pagematch: 1, sectionmatch: 1

Tabo-an market hawanan na's mga nanimuyo

CEBU, Philippines - Sugod sa Septiyembre 13, kinahanglang wala nay magpuyo ug mangatulog sulod sa Tabo-an public market.

Kini ang unod sa gi-Sinugboanon nga pahibalo nga giisyu ni market administrator Raquel Bohol-Arce ngadto sa mga pamilya nga anaa nagpuyo sa mga stall sa Tabo-an.

Sumala pa ni Bohol-Arce nga subay sa City Ordinance 1486 kon Market Code sa dakbayan sa Sugbo, gidid-an ang mga tawo paggamit sa mga stall sa merkado isip pinuy-anan ug katulganan.

Ang mga tawo nga makalapas sa maong ordinansa pahimagnoan pinaagi sa usa ka sulat ug hatagan og pito ka adlaw aron sa pagpahawa sa gi-okupar nila nga puwesto ug ang dili makatuman niini adunay tulubagon sa kagamhanan.

Nasayran nga sa miaging bulan, nakigtigom ang mga tinugyanan sa City Market Authority sa ilegal nga mga nag-istar sa Tabo-an public market aron pahinumdoman sa nahisgutang ordinansa ug dunay pipila niini nga hatagan og igong panahon aron ilang mabakante ang gigamit nilang puwesto.

Apan niadtong Septiyembre 1, ang kagamhanan miisyu na gyud og “notice to vacate” nga mo-epekto sugod sa Septiyembre 13.

Pipila sa mga maapektohan sa maong kamandoan mibalibad pagdawat sa notisya apan adunay uban nga mi-uyon usab, apan matud ni Bohol-Arce nga masuta ra gyud ang tibouk nga resulta niini sa higayon nga sugdan na ang pagpatuman niini.  – BANAT NEWS

  • Follow Us: