Apas-BMO gibawian sa sakyanan
CEBU, Philippines — Gibawi ni Cebu City Mayor Tomas Osmeña ang sakyanan nga gipagamit sa Apas-Barangay Mayor’s Office human nakadawat og report nga matud pa gigamit gihapon kini ni Renato Jardaleza bisan og gitaktak na sa trabaho.
Ang mayor nakadawat og impormasyon gikan sa kasaligang tinubdan nga human si Jardaleza gitaktak sa trabaho sa niaging semana kini nakit-an nga nagmaneho pa sa sakyanan nga iya sa siyudad niadtong Martes.
“They’re ignoring me, okay. Ignore me, I ignore you same thing right? Politically I’m making a very bad move I don’t care I’m just doing what is right,” matud ni Osmeña.
Si Jardaleza gitaktak isip staff sa BMO human matud pa maoy nagpaluyo sa giingong illegal solicitation sa mga business establishments aron gamiton sa ilang contingent sa Sinulog.
Gigamit sa BMO ang official seal sa siyudad ug sa barangay nga kalapasan sa balaud.
Si Osmeña niingon nga gibulingan ni Jardaleza ang iyang administrasyon ingon man ang imahe sa BMO ug dili niya konsentihon ang ingon niini nga binuhatan.
Ang sakyanan gitugyan sa mayor kang Apas Barangay Konsehal Virgil Cabigon nga maoy gitahasan ni Osmeña sa pag-atiman sa BMO hulip sa kanhi chairman nga si Joel Trompeta.
Naa na kang Cabigon kun iyang i-terminate o dili ang mga BMO staff sa maong barangay.
Usa sa gihatag nga tahas ni Osmeña kang Cabigon mao nga tutukan niini ang Long Life Medical Assistance Program (LLMAP) nga iyang gihulagway nga ang tanan mahimong makabenepisyo niini. (GMR) (BANAT)
- Latest