Mga dalan sa Pasil naalihan

CEBU, Philippines — Giplanuhan sa kagamhanan sa siyudad sa Sugbo nga ipaubos sa reblocking ang Sitio Lawis, Barangay Pasil, dakbayan sa Sugbo nga naigo sa dakong sunog niadtong adlaw’ng Sabado.

Gibanabanang 326  ka balay nga gipuy-an sa 711 ka pamilya ang naugdaw sa maong sunog.

Gibisita ni Cebu City Mayor Tomas Osmeña ang dapit nga nasunog ug kini miingon duna siya’y mga nakita nga problema mahitungod sa pagresponde sa sunog.

Pipila sa iyahang nakitang problema mao nga wala’y kooperasyon sa mga tawo, gamay ang agianan ug daghang ekipo ang may problema. “I have to sit down with Dave (Konsehal Dave Tumulak) to sort this out.  Even the fire hoses are not compatible and you know it takes us year to find they are not compatible,” sigon ni Osmeña.

Ang Operations Head sa Division for the Welfare of the Urban Poor (DWUP) Genevieve Alcoseba miasoy makabalik ra sa ilang lugar ang mga biktima sa sunog ilabi na kon structure owner tungod kay ang yuta nga gipabarugan sa mga panimalay kabahin sa Slum Improvement and Resettlement Area nga iya sa siyudad.

“’Galing lang usa pa sa ikonsiderar kay according sa report usa sa nahimong babag gyud sa kining pagpawong sa kayo ang road right of way man. So tan-awon gyud nato especially basin ma-resolve nato diri ang mga issue sa encroachment since totally burned man, basin diha pud nga mga aspeto ma-take up nato ng mga ginatawag nga encroachment especially sa atong mga specific pathways o mga alleys  nato ba,” asoy ni Alcoseba. Ang pangulo sa Cebu City Disaster Risk Reduction Management Office (CCDRRMO) Nagiel Bañacia miasoy ang buhaton nila mao ang pagbalik sa development plan sa SIR aron balikon ang sukod sa mga yuta nga gi-award sa mga specific nga mga tawo.

Asoy ni Bañacia base sa session sa Barangay Council sa Pasil, nakita nila nga dunay mga  gipangtukod diha mismo sa mga agianan mao nga paspas kaayo ang pagkatap sa kalayo ug naglisod ang mga bombero pagsulod. (BANAT NEWS)