Banat ( Leaderboard Top ), pagematch: 1, sectionmatch: 1

Tinguha sa Talisay way mamatay sa dengue

CEBU, Philippines — Tinguha sa City Health Office sa Siyudad sa Talisay nga mapaubsan gyud nila ang gidaghanon sa mga namatay sa sakit nga dengue.

Si Dr. Lino Alanzado, pangulo sa CHO, nagkanayon nga sa niaging tuig nakatala sila og 12 ka namatay sa dengue.

Iyang gikasubo ang maong gidaghanon maong sila naningkamot nga mapaubsan o ba kaha wala na gyu’y mamatay gumikan sa sakit nga dengue.

Siya nagkanayon nga padayon ang ilang programa sa pagbomba sa lugar nga adunay gikabalak-ang mga lamok nga nagdala sa sakit nga dengue ug ila pa gyud kining hingusgan.

Giawhag sab nila ang mga ginikanan nga kun ang ilang anak hilantan sulod sa tulo ka adlaw, moduol dayon sa labing duol nga sentro aron mahatagan sa eksaminasyon sa NS1 nga libre nga maoy modeterminar kun ang usa ka bata adunay dengue.

Sa pagkakaron ilang gipangbalik ang mga lugar diin dunay daghang natala nga dengue ug ila na nga gihangyo ang mga opisyal sa barangay sa pag-uban kanila aron awhagon ang mga ginikanan sa pagpanglimpyo sa ilang palibot aron dili paboritong puy-an sa mga lamok nga nagdala sa dengue ang ilang lugar.

Dugang ni Alanzado nga unta dili masupakon ang mga residente tungod kay ang ilang gibuhat alang ra man gyud sa katawhan.

Sa nasayran, ang Siyudad sa Talisay nalakip sa top 5 nga may labing daghang kaso sa dengue niadtong niaging tuig. (BANAT NEWS)

 

  • Follow Us: