Dili padad-on og sakyanan
CEBU, Philippines — Mga kaparian ug mga layko giawhag nga di magdala og mga sakyanan atol sa paglubong kang Archbishop Emeritus Ricardo Cardinal Vidal karong Huwebes diha sa Cebu Metropolitan Cathedral.
Kini tungod kay walay parking area ug gipaabot nga adunay bagang duot sa katawhan ang moyukbo sa nitaliwan nga Cardinal.
Si Msgr. Joseph Tan, ang tigpamaba sa Archdiocese of Cebu nga nahinabi sa Banat News miingon nga hagip-ot gyud ang lugar.
Ang mga kaparian gikan sa norte adto mobilin sa ilang sakyanan sa St. Joseph Parish Mabolo, ang gikan sa South adto sa San Pedro Calungsod Chapel, South Road Properties, samtang ang gikan sa Centro anha sa may Archbishop Residence ug adunay mga buses nga mohakot kanila padulong sa Cebu Metropolitan Cathedral. Dugang pa ni Tan, lakip sa magsakay og bus ang mga obispo ug pamilya ni Vidal, kini subay sa rekomendasyon sa kadagkuan sa Cebu City Traffic Office aron malikay sa traffic tungod sa kadaghan unya sa bul-og sa tawo nga mohatud sa lubong.
Sumala pa ni Tan, aduna lamang pipila ka mga sakyanan ang gihatagan og car passes kinsa kadtong mga adunay gitrabaho alang sa lubong sa Cardinal. (BANAT NEWS)
- Latest