2018 Talisay City budget apil ang para sa barangay
CEBU, Philippines — Ilakip ni Talisay City Mayor Eduardo Gullas sa budget sa 2018 ang mga proyekto sa barangay nga iyang gipangayo ngadto sa konseho niadtong miaging semana.
Si Gullas niawhag sa mga opisyales sa barangay nga mohimo og mga dinaliang proyekto sa ilang tagsa-tagsa ka barangay sa nahabilin nilang mga buwan tungod sa pagkanselar sa piniliay karon unta’ng sunod semana. Ang piniliay sa Sangguniang Kabataan (SK) ug barangay pagahimuon unta karong Oktubre 23 ning tuiga apan gisibog kini ngadto na sa Mayo 2019.
Si Gullas ang nipaluyo sa pag-uswag sa piniliay apan dili siya uyon nga itudlo na lang ang mga opisyal sa barangay.
Gikatakdang mopatawag og tigom si Gullas sa 22 ka mga barangay kapitan aron iyang pangayoan og panahom sa proyekto nga ilang gitinguha sa ilang lugar.
Siya nagkanayon nga unta ipadaplin una ang politika ug moserbisyo lang una sa ilang mga konstituwente nga nagbutang nila sa maong posisyon.
Si Gullas niadtong miaging semana nangayo og kapin usa ka bilyon ka pesos alang sa budget sa siyudad sa tibuok tuig 2018.
Ang dako nga bahin niini gamiton sa mga inprastraktura, drainage, pag-ayo sa mga guba nga karsada ug uban pa. (BANAT NEWS)
- Latest
