Osmeña salig nga mabasura iyang kaso
CEBU, Philippines - Masaligon si Cebu City Mayor Tomas Osmeña nga ang Office of the President mopabor sa iyaha may labot sa kaso sa Dodge cars.
Kini human nga mihatag siya og kopya sa desisyon sa Office of the Ombudsman nga nahukman niadtong Oktubre 13, 2016 nga nag-dismiss sa kaso gumikan sa kakuwang sa probable cause. Si kanhi mayor Michael Rama ang misang-at og kaso batok kang Mayor Osmeña sa Ombudsman niadtong tuig 2012 ug nipasangil nga milapas si Osmeña sa Republic Act 3019 kun Anti-Graft and Corrupt Practice Act.
Gipasanginlan si Osmeña nga midawat sa duha ka US-made Dodge Charger cars nga gidonar sa magpapatigayong si Michael Gleissner, chairman sa Bigfoot Entertainment dihang siya pay mayor.
Gihisgutan sa mayor ang maong kaso human migawas ang balita nga ang Office of the President nagsugod na sa ilang imbestigasyon sa Dodge cars case nga gisang-at ni Apas Barangay Captain Ramil Ayuman niadtong Pebrero 14 ning tuiga.
“That’s already the Ombudsman, signed by Morales herself, how can somebody in the Office of the President rank higher than Morales, I don’t know,” asoy ni Osmeña.
Nagtuo si Osmeña nga ang lakang ni Ayuman gituyo aron molingkod isip acting mayor sa taga oposisyon.
Si Osmeña nag-atubang og walo ka administrative cases nga gi-file sa mga konsehal nga kaalyado sa Team Rama nga nagtinguha nga suspensuhon kini sa iyang katungdanan.
Si Ayuman miingon nga siyam ka tuig nilang gipangita ang mga dokumento nga makapalig-on sa kaso nga makapamatuod nga dunay malisya ang pagdawat sa mayor sa maong mga sakyanan. - /EIM) (BANAT NEWS)
- Latest
