Loot nasagmuyo sa report
CEBU, Philippines - Nasagmuyo si Daanbantayan Mayor Vicente Loot sa taho sa giingong pagdawatan niya og payola nga P1 milyon gikan sa bigtime Eastern Visayas drug distributor nga si Kerwin Espinosa.
Matud ni Loot nga sayop ang taho ug dili mao ang tinud-anay nga nahitabo atol sa Senate inquiry nga iyang gitambungan ug ni Espinosa.
“The headline is designed to attract attention insinuating accusation rather than discussing the explanation which was actually the purpose of such appearance in the Senate,” matud ni Loot.
Si Loot nipadala og kopya sa iyang pakigpulong atubangan sa Senate committee on peace and order diin iyang giasoy ang iyang mga kalampusan ug pasidungog nga naangkon sa limpyo ug dalaygon niyang pagserbisyo sa Philippine National Police sulod sa 33 ka tuig.
Matud ni Loot nga ang maong kadungganan giguba lang sa paglambigit kaniya sa kontrobersiya sa ilegal nga drugas diin siya gitumbok nga protector ni Espinosa.
Gipadayag ni Loot nga hinimohimo lang sa mga tawo nga iyang natamakan ug sa mga kaatbang sa politika ang giingong intelligence report.
Gitumbok ni Loot ang mismong pamahayag ni Espinosa nga dili sila kaila sukad masukad labi na nga wala silay transaksiyon sa personal ug bisan sa tawag sa telepono.
Gipasabot ni Loot nga sa ulahing pito ka tuig niya sa serbsiyo wala siya’y posisyon nga makamando sa pagpahigayon og mga operasyon batok sa drugas ug kriminalidad.
Giangkon ni Loot nga sa niaging lima ka buwan nasakitan na siya ug ang iyang pamilya sa nanggawas nga sayop nga balita batok kaniya.
Lakip sa naapektuhan ang kredibilidad sa iyang asawa nga si kanhi mayor Maria Luisa Loot ngadto sa mga bangko isip usa ka negosyante.
Nagpasalamat lang gihapon si Loot sa kahigayonan nga gihatag sa Senado ug nanghinaut nga makasugod na siya pagbangon. (BANAT NEWS)
- Latest