Upat ka oras natanggong sa SRP

CEBU, Philippines - Naabtan og kaadlawon diha sa kadalanan ang mga motorista nga niagi diha sa South Road Property (SRP) habig sa Brgy. Cansojong, Dakbayan sa Talisay niadtong miaging adlaw tungod sa nababag nga trailer truck.

Ang trailer nga gimaneho ni Russel Ambalzado nasangit sa wire sa kuryente nga nayungyong sa agianan niini hinungdan nga nabira ang linya ug nakaingon sa pagkatumba sa pipila ka poste ug naharag ang uban.

Ang poste nga natumba ang nibabag gyud sa karsada lakip na ang mga wire niini sa duha ka lane sa SRP. Hinungdan nga ang mga motorista nga mosulod ug gawas sa siyudad sa Sugbu ang nangatanggong.

Gipaabot pa nila ang taga City of Talisay-Traffic Operation Development Authority (CT-TODA) ug ang tinugyanan sa telecommunication ug electric company nga maoy mohawan sa mga wire ug poste.

Apan ang paghawan sa mga nakababag ang naabtan og upat ka oras gikan gisugdan alas-10 sa gabii. Walay laing nahimo ang mga dagko nga sakyanan kundi ang pagpaabot kun kanus-a makalahos samtang ang mga gagmay nga sakyanan nag-iyahay sa paglusot aron makalahos sa ilang destinasyon.

Walay mga sakyanan nga naigo sa poste sa pagkatumba niini ug pagsuwat sa balita giayo na ang nagharag nga poste. (BANAT NEWS)