72 ka paresan gidungan og kasal

CEBU, Philippines - Miabot sa 72 ka paresan nga taga Siyudad sa Naga ang dungan nga nagpakasal kagahapon sa simbahan ni San Francisco sa Assisi Parish.

Gipasiugdahan ang maong mass wedding sa kagamhanan sa nahisgutan nga dakbayan pinangulohan ni Mayor Kristine Vanessa Chiong isip kabahin sa mga kalihukan alang sa kasaulogan sa ilang charter day karong semanaha.

Matud ni Mayor Chiong nga igo na lang niyang gisunod ang programa sa iyang amahan kay ang kaminyuon, mahinungdanon ilabi na sa pagsugod og tukod og pamilya.

Dugang sa mayor nga gilibre nila ang tanang rekisitos sa pagpakasal lakip na ang ilang pagkaun sa reception nga gihimo sa kilid sa simbahan. Ang maong kalihukan ika-unom na kini ka tuig sukad nga gihimo ni kanhi Mayor Valdemar Chiong ang amahan ni Mayor Kristine.

Nabantayan nga niubos na ang paresan nga nagpakasal hinungdan nga sila nagtuo nga nagkagamay na sab ang nag-ipon nga wala’y bendisyon sa simbahan.

Si Venita Lakang-Lakang, 54 anyos niingon nga damgo niyang makasal sa simbahan bisan og nakasal na sila sa iyang bana sa sibil. Nagpasalamat sila sa kagamhanan sa dakbayan sa Naga nga nakapahimulos sila sa maong programa.

Nahimong sponsors sa maong mass wedding silang Bise Gobernador Agnes Magpale, asawa ni Gobernador Hilario Davide III nga si Jobelle, First District Congressman Samsam Gullas nga wala nakatambong kay dunay sesyon sa kongreso. (BANAT NEWS)