Mga sakyanan gipang-uli sa Kapitolyo

CEBU, Philippines - Walay ikagasto ang ubang barangay sa pag-atiman sa mga sakyanan nga gihatag sa kagamhanan sa Probinsiya sa Sugbo hinungdan nga adunay gipang-uli.

Apan matud sa hepe sa Provincial General Services Office, Jone Siegfred Sepe, nga ang maong mga sakyanan nga giuli panahon pa sa unang administrasyon.

Base sa talaan sa PGSO mokabat sa 30 ka multicabs ang gipang-uli sukad niadtong Enero.

Sa administrasyon ni Gobernador Hilario Davide III ubay-ubay na nga sakyanan ang gipanghatag ngadto sa kalungsuran ug kabarangayan.

Kasagaran nga gipanghatag mga mini-ambulance ug multicabs.

Matud ni Sepe nga ubos sa kasabutan, ang probinsiya maoy mo-renew sa insurance sa sakyanan ug sa rehistro sa Land Transportation Office.

Apan ang lungsod, siyudad ug barangay nga nakadawat sa sakyanan maoy moabaga sa maintenance ug gasolina.

Giklaro ni Sepe nga ang mga nakadawat og sakyanan mao kadtong nangayo sa Kapitolyo.

Matud ni Sepe nga ang mga siyudad ug lungsod adunay budget alang sa maintenance sa sakyanan.

Apan adunay mga barangay nga niuli sa mga sakyanan tungod kay dili na gyud modagan ug wala sila’y ikasugakod sa maintenance.

Gawas niini ang mga sakyanan nga gipanghatag ngadto sa bukirang barangay dili gyud molanat og dugay tungod sa pagsige og tungas ug lisud usab ang karsada.

Gibutyag ni Sepe nga ang gipanghatag nga multicabs mga refurbished kini.

Kasagaran sa mga bukirang barangay gamay ra og income ug Internal Revenue Allotment hinungdan nga maglisud sa maintenance sa sakyanan.

Ang mga sakyanan nga gipang-uli nilanat lang og upat ngadto sa lima ka tuig ug nahatag kini panahon pa ni kanhi gobernador Gwendolyn Garcia nga karon kongresista sa ikatulong distrito.

Dugang ni Sepe nga sa gipanghatag nga mga sakyanan sa administrasyon karon wala pay gipang-uli.

Laing 29 ka mini-ambulance na usab ang gikatakdang ipanghatag sa pagkakaron sa Kapitolyo. (BANAT NEWS)