Dumpit: pagtarong mo!

CEBU, Philippines - Nahibalik na gyud sa dakbayan sa Sugbo ang gikahadlokan sa mga kriminal nga si SPO1 Adonis Dumpit ug iya dayon nga giawhag ang mga badlungon sa katilingban nga magtinarong na ug mohunong sa ilang dautang bisyo.

Gipagawas na kagahapon si Dumpit sa kadagkoan sa Leyte Regional Prisons nga nagbase sa Abuyog, Leyte human siya gipiyansahan ni incoming Cebu City Mayor Tomas Osmeña og P250 mil. Ang pag-abot ni Dumpit dinhi sa dakbayan gihangop dayon sa gatusan ka netizens nga miabi-abi kaniya pinaagi sa social media ug nangindahay nga mapuo niya ang mga badlungon sa katilingban.

Si Dumpit personal nga gikuha ni Miguel Osmeña, anak ni Mayor Osmeña, didto sa dakbayan sa Tacloban diin nagpaabot kaniya ang pribado nga abyon nga maoy ilang gisakyan paingon sa Mactan        Airport.

Pagtugpa sa abyon nga gisakyan ni Dumpit ug Miguel sa Mactan Airport, gisugat dayon sila sa mapahiyumon nga si Mayor Osmeña ug mipasakay kang Dumpit sa usa ka bullet proof nga sakyanan.

Matud ni Osmeña nga gituyo niya nga sakyanan nga dili madutlan og bala ang pasakyan ni Dumpit aron pagsiguro sa seguridad sa iyang umaabot nga close-in security escort nga wala pay armas.

Usa ka suod nga higala ni Osmeña ang mipagamit sa bullet proof nga sakyanan nga gipasakyan kang Dumpit gikan sa airport paingon sa usa ka hotel dinhi sa Dakbayan sa Sugbo.

Ang Freeman/Banat News maoy gihatagan ni Osmeña og higayon nga makahinabi dayon kang Dumpit. Matud ni Dumpit nga gidawat niya ang hagit sa mga Sugboanon nga motabang siya pagpatunhay sa kalinaw dinhi sa dakbayan.

Usa si Dumpit nga gikatahapan kaniadto nga sakop sa gidungog nga “vigilantes” nga responsable sa daghang pagpamatay sa mga badlungon sa katilingban.

Nakombikto si Dumpit sa pagpusil ug pagpatay sa usa ka 17-anyos nga lumolupyo sa Brgy. Tejero, apan ang Court of Appeals mitugot ni Dumpit nga makapiyansa samtang giapelar pa ang kaso.

Ug tungod kay ang kasong grave misconduct nga gipasaka ni Dumpit gi-dismiss man sa kadagkoan sa kapolisan, si Dumpit makapadayon sa iyang serbisyo isip polis.

Matud ni Dumpit nga karong Lunes, makigkita siya kang Police Regional Director Patrocinio Comendador Jr. aron makabalik na siya sa serbisyo. (BANAT NEWS)