Pustaanay kun kinsa ang modaog sa mga kandidato gidili

CEBU, Philippines - Sibaw kaayo karon ang mga tabi-tabi nga daghan na ang nagpustaanay kun kinsa ang modaog nga mga kandidato sa lainlaing katungdanan sa kagamhanan nga ilang gidaganan.

Tungod niini, ang hepe sa kapolisan sa dakbayan sa Talisay nipasidaan sa mga sugarol nga dakpon sila sa mga polis kun masakpan sa ilang gihimo kay kalapasan kini sa balaod.

Si Superintendent Germano Mallari miingon nga nakadawat siya og report   kalabot sa pustaanay karong piniliay, apan iya pa kini nga gipapanid-an sa iyang mga sakop.

Daghan hinoon ang wala mahadlok sa pasidaan ni Mallari kay nasayod sila nga lisod kaayo nga masakpan ang magpustaanay nga ang mga nalambigit lang ang masayod. Bisan si Mallari miangkon nga lisud kaayo sakpon ang mga magpustaanay kay sagad ila ra kining himoon sa hilom nga paagi ug lisud kini makuhaan og ebidensya.

"Ang sugal o pustaanay gidili gyud na sa atong balaod. Kun dili masakpan, swerte, pero kun masakpan man gani, aw tanggong gyud. Usahay mao man gud  kini ang magpasiugda sa gubot tungod kay molaban naman sa kuwarta," matud ni Mallari.

Si George, 53-anyos niangkon nga giduol siya og usa ka tawo nga gustong makigpustaanay kun kinsa ang modaog sa mga kandidato pagka mayor sa Talisay.

Matud ni George nga dakong kantidad ang gibungat sa sugarol nga niduol kaniya ug adto siya mopusta ni kanhi kongresista Eduardo Gullas kontra sa hiniusang botos nila ni Mayor Johnny de los Reyes ug Bise Mayor Romeo Villarante.

Nagkanayon si George nga aduna say pustaanay sa nilansar pagka bise mayor tali kanila ni kanhi Bise Mayor Alan Bucao ug ni Konsehal Danny Caballero. Samtang nagkaduol ang piniliay, nahimong mainiton na ang mga kandidato ug ang ilang mga supporters. Gani matud ni Mallari nga naglinangkatay na sa ilang mga poster ang isig ka kampo.

Gitataw ni Mallari nga ang usa ka kampo nireklamo kaniya nga gitangtang ang iyang posters samtang ang usa nipadangat usab og sama nga reklamo.

"May usa nga nisumbong apan ang iya diay'ng mga poster wala sa common posters’ area mao nga  gitangtang.  Ang usa usab nisumbong nga gilangkat ang iyang poster pero sa pagsusi subra ra ang gidak-on mao nga gitangtang," matud sa hepe sa kapolisan.

Si Mallari miingon nga bisan kinsa mahimong makadakop sa mga tawo nga masakpan nga nilangkat sa mga poster, ilabi na kun anaa kini gibutang sa Comelec designated area. (BANAT NEWS)