2 USC nag top sa bar, taga Freeman pasar

CEBU, Philippines - Pag-eskuyla pa lang, iyang gipunting nga ma top 1 sa Bar Examination. Wa man niya masungkit ang pinakataas nga pwesto, nalipay gihapon ang 25-anyos nga tinun-an sa Law School sa University of San Carlos nga ikaduha kini sa nakapasar.

Si Athena Plaza Suma Cum Laude sa kurso nga Business Administration major in Legal Management ug Cum Laude sa pagtungha niya sa abogasya.

Nakuha niya ang ikaduhang pwesto sa 2015 Bar Examination pinaagi sa iyang 87.25 passing percentage.

Laing tinun-an sa USC nga nalandig sa ika-walong pwesto mao si Jecca Jacildo nga nakakuha og 85.85 percent nga average.

Si Plaza nahibalo sa iyang kalampUsan pinaagi sa dean sa college of Law sa USC nga si Dean Joan Largo kinsa mitawag kaniya ug mipahibalo nga top 2 siya sa bar exam.

“Shock kaayo ko kay wala pa man gi-release ang list and ma’am Joan told me and said nga top 2 daw ko and then murag grabe kay grateful kaayo ko ni Lord kay as in gi-pray gyud ni nako everyday for 5 months,” matud ni Plaza.

Matud niya naglisod usab siya atol sa exam particular sa Remedial Law apan matud pa sa bag-ong abogada, nga kinahanglan aduna ray pagsalig sa kaugalingon.

Human siya mi-gradwar sa law school, iyang gihatagan ang iyang kaugalingon og break sa pipila ka adlaw dayon nagsugod siya sa iyang review dinhi sa Sugbo, hasta iyang Facebook account iyang gi-deactivate aron way istorbo.

Siya anak og retiradong polis nga maoy nag-encourage kaniya sa abogasya, ang iyang inahan magtutudlo sa Guadalupe National High School.

Interesado siya sa Civil Law ug Commercial Law.

Lakip sa nakapasar sa maong Bar Examinations ang Lifestyle Section assistant sa igsuong pamantalaan sa Banat News nga The Freeman nga si Sarah Jane Nengasca.

Matud ni Nengasca nga niuli siya sa ilaha sa Tabuelan ug didto nag-online review isip pagpangandam sa iyang pag-take sa BAR exam.

Siya nagkanayon nga nakulbaan siya sa pagtan-aw sa iyang ngalan nga naapil sa nakapasar sanglit nahitabo na nga wala siya makapasar sa una niyang take niini.

Miangkon si Nengasca nga nalisdan gyud siya sa exam apan misalig ug nag-ampo sa Kahitas-an. (BANAT NEWS)