Tig-vulcate gipusil patay

CEBU, Philippines - Patay ang usa ka lalaki human gipusil sa wala mailhing mga lalaki nga nagsakay og motorsiklo sa Kagudoy, Basak, Dakbayan sa Lapu-Lapu pasado alas 6 sa niaging Sabado sa gabii.

Si Rolando Igot, 43, gipusil samtang nanirado sa iya’ng vulcanizing shop nga nahimutang daplin sa karsada. Matud ni Police Officer 3 Joseph Rouel Cutanda sa Lapu-Lapu City Police Office-Homicide Section nga ang duha ka lalaki kalit niabot atubangan sa vulcanizing shop ug gipusil ang biktima sa luyong bahin sa lawas.

Ang inahan sa biktima nga si Beatriz nakadungog og tulo ka buto ug dihang nigawas siya sa ilang balay, nakurat siya nga ang iyang anak ang gipusil ug nakaangkon og samad pinusilan sa liog ug sa bukobuko. Gidala sa Lapu-Lapu City Hospital ang biktima apan gideklarar nga dead-on-arrival.

Tulo ka basiyo sa bala sa .45 caliber pistol ang na-recover sa crime scene, matud ni Cutanda.

Matud ni Cutanda nga si Igot kanhi napriso sa Lapu-Lapu City Jail sa kasong homicide ug posibleng planado ang pagpatay sa biktima. (BANAT NEWS)