Roble Shipping mopabiyahe og barko sa Mactan Channel
CEBU, Philippines - Andam nga motagana og mga barges ug ferry boats ang Roble Shipping Lines nga mobiyahe sa Lapu-Lapu ug Mandaue cities kun mahinayon ang pagsirado sa Mandaue-Mactan Bridge.
"Of course motabang ko para sad di ma-late sa trabaho ug sa ilang pag-eskuwela ang atong mga pasahero," matud pang Jose Emery Joy Roble, tag-iya sa maong shipping lines.
Matud pa ni Roble iyang ipagamit ang MV Twinkle Star nga makahimo pagkarga og 200 pasahero nga paigo ang gidak-on aron makadunggo sa gamay nga wharf sa habig sa Lapu-Lapu.
Hinuon dili pa niya dayon kini mahimong ipagamit sanglit kinahanglan pa kini ibaradero sud sa 20 ka adlaw.
Si Roble, kinsa mikandidato pagka kongresista ubos sa Ang Guro partylist miingon nga walay sagol politika kining iyang pagtabang sa pagsulbad sa problema dala niining pagpasira unya sa taytayan.
Sa sayo pa, si Atty. Jose Cabatingan ang tigpamaba sa Maritime Industry Authority-7 mipahibalo nga ang Lite Shipping Corporation mipahibalo usab nga andam silang mopagamit sa ilang mga barko sa samang katuyoan.
Ang pagpaayo sa maong taytayan gipaabot nga mahuman karong Disyembre 23 ning tuiga. (BANAT NEWS)
- Latest
