Tawo gipatay didto sa Bogo City
CEBU, Philippines - Patay ang usa ka lalaki nga gipusil sa wala pa hiilhing tawo didto sa Sitio Kalubihan, Barangay Don Pedro Rodriguez, dakbayan sa Bogo kaniadtong tungang gabii sa miaging Martes.
Si SPO4 Reynaldo Rosaceña sa Bogo City Police Station miila sa biktima nga mao si Felimon Tahanlangit, 35-anyos, minyo nga nagpuyo sa Barangay Lamintak Sur, Medellin.
Matud ni SPO4 Rosaceña nga sa pakisusi nga ilang gihimo ilang nasuta nga duha ka samad pinusilan sa ulo ang naangkon sa biktima nga maoy hinungdan sa iyang kamatayon.
Gitataw ni SPO4 Rosaceña nga walay nakakita sa mga lumolupyo sa maong dapit kun kinsa ang mipusil ug mipatay sa biktima kay igo lang sila nga nakadungog og lanog nga buto sa armas.
Dugang ni Rosaceña nga ang dapit nga nahitaboan ngitngit kaayo ug nakapatingala kanila nga niabot ang biktima didto ug siya gipusil.
Sa dapit diin nagbuy-od ang patay’ng lawas sa biktima, ang kapolisan nakakaplag og duha ka kabhang sa bala nga 9 mm nga ilang gituohan nga maoy nakapatay sa biktima.
Si SPO4 Rosaceña miingon nga mohimo pa sila og dugang imbestigasyon sa maong hitabo aron mahibaw-an kun kinsa ang kriminal ug nganong gipatay ang biktima. (BANAT NEWS)
- Latest
