Pusher, 3 nagsuyop sikop sa buy-bust
CEBU, Philippines - Nasikop sa kapolisan ang gikatahapang pusher og shabu ug naapil pa ang laing tulo nga gidudahan usab nga nagsuyop sa buy-bust alas 6 pasado sa niagi’ng gabii sa Purok Ubi, Paknaan, Dakbayan sa Mandaue.
Si Police Officer 2 Dexter Pacayra sa Mandaue City Police Office (MCPO) niila sa mga nadakpan nga sila si Christopher Diano, 30; Garry Rabotana, 32; Jacob Manatad, 25 ug Ulyn Ceniza, 39, pulos nagpuyo sa nahisgutang dapit.
Matud ni Pacayra nga ang team sa City Intelligence Bureau sa MCPO ang nihimo sa buy-bust operation human nakadawat og taho labot sa ilegal nga kalihukan sa mao’ng dapit.
Dugang ni Pacayra nga ang kauban nila nga polis nga nagsilbi’ng poseur buyer ug diha’ng gitunol ni Diano ang usa ka pakete’ng shabu bugti sa P200 nga marked money, dali kini nila’ng gisikop.
Ang tulo ka kauban ni Diano nga sila si Rabotana, Manatad ug Ceniza ang wala nakalihok diha’ng ila’ng nakuhaan og drug paraphernalia hinungdan nga lakip kini sa ila’ng gisikop.
Nagtingkagol na sa detention cell ang upat ka dinakpan kinsa pasakaan og tukma’ngkaso. (BANAT NEWS)
- Latest