DENR nanghunaw sa kalangay
CEBU, Philippines - Nahimong kontrobersiya ang road widening project sa siyudad sa Naga paingon sa Carcar gumikan sa isyu sa pagpamutol og kahoy.
Apan nanghunaw karon si Department of Environment and Natural Resources Secretary Ramon Paje nga dili ang ilang ahensiya maoy nagpahunong sa maong proyekto kondili ang Department of Public Works and Highways(DPWH).
Nagkanayon si Sec. Paje nga sila sa DENR igo lang naghatag og suporta sa ubang ahensiya sa ilang mga ipatumang proyekto.
Dugang ni Paje ang pagpatuman og road widening sa siyudad sa Naga paingon sa Carcar anaa sa balaod ug duna g’yud kini pundo nga gitagana.
Sa nahitabo sa maong proyekto, giingong ang DPWH lang ang dunay gahom sa pagpahunong sa maong proyekto ug dili ang ilang ahensiya.
Gihulagway ni Paje nga human midesider ang DPWH nga ipahunong ang maong proyekto gibakwi usab nila ang permit nga nagtugot pagpamutol og kahoy tungod kay dili man mahimo nga mohatag sila og permit kun gipahunong na ang road widening project.
Gumikan sa maong hitabo ang DENR mipagawas og guidelines nga ang DPWH Central Office kinahanglan i-review ang tanang road widening projects ug dili pwede nga ang district o ang region lang ang muhimo niini.
Gani mipagawas og kamanduan ang Secretary nga modawat lang sila og request for cutting kun maggikan kini sa Central Office sa DPWH.
Kini nagpasabot nga kinahanglan nga mosumitir pa ang district ug regional office sa ilang request sa ilang ulohang buhatan aron matun-an una sila mohatag og pagtugot. (BANAT NEWS)
- Latest