Problema sa drugas tukion sa RPOC
CEBU, Philippines - Tukion sa tigum sa Regional Peace and Order Council (RPOC) ang problema sa ilegal nga drugas human sa sunod-sunod nga nahitabong patay ilabi na sa lalawigan sa Bohol.
Si RPOC chairman, Gob. Hilario Davide III, mipahibawo nga magtigum sila sunod buwan o kaha sa Oktobre aron pagtuki sa mga isyu may kalambigitan sa kalinaw ug kahusay sa rehiyon.
Ang bag-ong kumander sa Central Command, Major Gen. Nicanor Vivar, nipadayag sa kaandam sa pagtabang sa military ngadto sa kapolisan aron pagsumpo sa ilegal nga drugas.
Si Vivar ni-courtesy call sa buhatan ni Davide sa Kapitolyo kagahapon.
Matud ni Vivar nga duna sila’y gitawag og JTF kun Joint Task Force nga makatabang sa Philipine National Police.
Gihisgutan tali ni Davide ug Vivar ang anti-insurgency campaign diin tinguha sa duha ka habig nga mamintinar nga insurgency free ang tibuok lalawigan sa Sugbo.
Si Vivar mibutyag nga hinay-hinay na nilang gikombinser ang mga walhong pundok nga mobalik sa sabakan sa gobiyerno.
Nanghinaut usab si Vivar nga ang mga rebelde sa Samar ug Negros mokanaug na aron mas mapalambo pa ang tibuok Kabisay-an. (BANAT NEWS)
- Latest
