2 TUIG nga sex slave

CEBU, Philippines - Gihimong duwaan sa lawasnong kalipay o ‘sex slave’ ang usa ka 13-anyos nga anak-anak sa usa ka lalaki sulod sa tulo ka tuig diha sa usa sa mga barangay sa lungsod sa Argao.

Ang biktima nga nagpangidaron og 13-anyos ug tinun-an sa grade 4 mipasangil nga gipahimuslan kini sa iyang 51-anyos nga ama-ama nga lumad nga  taga Alcantara.

Sa pakighinabi sa Banat News sa hepe sa kapolisan sa lungsod sa Argao Insp. Alejandro Batubalunos, misaysay kini nga niadtong Sabado sa buntag ang iyaan sa biktima maoy midangop sa ilang buhatan aron itaho kalabot sa gihimo sa suspetsado ngadto sa pag-umangkon niini.

Saysay pa ni Batubalunos nga ang iyaan mismo maoy nakasakop sa pagkahangol sa unod sa suspek dihang iyaha kining naabtang wala nay sapot ug nagpatong sa bata.

Sumala pa gibanghagan dayon sa iyaan ang suspek ug sa pagkakita sa suspek sa ginang tulin pa sa manatad nga mikaratel og dagan. Dihadiha mitug-an ang bata sa gidangatan niya sa mga kamot sa suspek.

Matud pa ni Batubalunos nga diha nga ilang gipangutana ang biktima mitug-an kini nga kadaghan na siyang gipahimuslan sa iyang ama-ama, base sa iyang nahinumdoman nga 11-anyos pa siya dihang una siyang gilugos sa suspek.

Gihulagway ni Batubalunos nga may kahadlok ang bata sa suspek ug posibleng mao kini ang hinungdan nga wala kini makaako og sumbong sa ubang mga kabanay.

Usa sa nakapait sa kahimtang sa biktima mao nga matud pang Batubalunos  nga taud-taod nang nasayod ang inahan sa biktima sa gipangbuhat sa suspek ngadto sa anak niini, giingong gibaharan lang sa inahan ang suspek kaniadto nga ipadakop kung usbon ang paglugos sa iyang anak.

“Igo raman to giingnan sa asawa ang suspect nga ‘basta mousab ka ha, isumbong tika sa polis’,” matud pang Batubalunos.

Human madawat sa kapolisan ang reklamo niadtong Sabado giadto dayon nila ang nahimutangan sa suspek apan nakaeskapo kini.

Nasayran nga ang suspetsado adunay duha ka anak nga babaye sa inahan sa biktima. (/EIM) (BANAT NEWS)