Banat ( Leaderboard Top ), pagematch: 1, sectionmatch: 1

Bar gironda 17 na-rescue

CEBU, Philippines - Dul-an 20 ka mga babaye ang nasalbar gikan sa usa ka bar samtang tulo usab ka tawo ang nasikop atol sa gipahigayong entrapment operation sa mga sakop sa Criminal Investigation and Detection Group (CIDG-7), International Justice Mission (IJM), Department of Justice ug Department of Social Welfare and Development (DSWD).

Ang nasikop mao ang tag-iyang mag-asawa nga nagpuyo sa dalan Del Pilar barangay Guizo sa dakbayan sa Mandaue ug ang gihulagway nga mamasang nga nagpangidaron og 36-anyos ug molupyo sa barangay Pajo, syudad sa Lapu-lapu.

Sa pakighinabi sa Banat News ni SPO1 Roel Leyson sa CIDG-7, mibutyag kini nga adunay concerned citizen ang midangop sa ilang buhatan tungod sa pasangil nga dunay nahitabong prostitusyon sa sulod sa maong bar nga nahimutang sa dalan Cabahug barangay Guizo sa syudad sa Mandaue.

Human makompirmar sa surveillance ang maong impormasyon gilusad dayon ang entrapment operation batok sa mga tag-iya ug sa gihulagway nga mamasang dihang gisikop na sila sa kapolisan.

Gawas niini, 17 ka mga babaye ang nasalbar sa kapolisan gikan sa giingong prostitusyon sa maong bar. Gisusi pa usab kung dunay mga minors sa maong mga babaye.

Matud pa ni Leyson nga base sa impormasyon nga ilang nakuha nga diha sa sulod sa maong bar maghilawas ang customer ug ang mga babaye sa mga pribadong kwarto nga abangan og P1,750. Apan kini kusganong gihimakak sa mga dinakpang operator ug miinsister nga bar lang gyud ang ilang negosyo.

Ang tigpamaba sa Department of Social Welfare and Development (DSWD-7) Jaybee Binghay mibutyag sa Banat News nga naa kanila ang mga nasalbar nga babaye.

Matud pa ni Binghay nga ila karun nga gihatagan sa unang panginahanglanon ang mga babaye sama sa mga pagkaon, sapot ug posibleng kapuy-an.

Ipaubos usab sila sa debriefing aron mawala ug makalimtan nila ang naagian.Wala hinuon mobutyag si Binghay kung kabubut-on ba sa maong mga babaye ang pagtrabaho sa maong bar.

Samtang si Fiscal Liceria Rabillas sa Department of Justice (DOJ) mibutyag sa diha nga nahinabi sa Banat News nga aduna sila’y nakuhang ginamit nga mga ‘condoms’ sa maong bar nga posibleng duna gyuy pakighilawas nga nanghitabo sa maong dapit.

Matud pa ni Rabillas nga kun tan-awon sa gawas ordinaryo ra kining imnanan apan aduna diay prostitusyon nga nahitabo sa sulod niini.    - BANAT NEWS

  • Follow Us: