Cabando mihimakak kay drayber lang siya

CEBU, Philippines - Gihimakak sa gitumbok nga lider sa Cabando-robbery group kinsa nasikop sa miaging buntag didto sa Sindangan, Zamboanga del Norte nga siya maoy lider sa maong grupo ug dili usab siya ang nakapusil sa duha ka gwardiya.

Kagahapong adlawa gipresentar sa Regional Intelligence Division (RID) si Dionisio Cabatingan alyas Junjun Cabando kini aron matubag ang mga pangutana sa mga sakop sa media bahin sa mga pasangil batok kaniya.

Si Cabando nagkanayon nga drayber ra siya sa motorsiklong gisakyan sa iyang tulo ka kauban kinsa pulos napatay sa mga mirespondeng polis human nila tulisa ang bank teller sa Chinabank diha sa Robinsons Mall niadtong Septiyembre tuig 2011.

Si Cabando nangangkong dihang nagbutobuto na misutoy siya og padagan sa iyang motor ug gibilin kini sa usa ka lugar dayon misakay siya og taksi padulong sa Subangdako sa dakbayan sa Mandaue ug gihapit ang iyang kapuyo nga si Marilyn Laguitao ug milahos sila sa Compostela ug nangikyas sila padulong sa Mindanao.

Gibutyag ni Cabando nga duna silay financier sa maong operasyon apan wala sila makaila ug kini maoy “nagdestino” kanila dinhi sa Cebu.

Samtang ang pamilya sa namatay’ng duha ka gwardiya nga silang Lito Odag ug Leofer Etac personal nga nakigkita kang Cabando kagahapon ug ilang gipadayag ang grabeng kasuko tungod sa pagkahanaw sa ilang mga mahal sa kinabuhi nga maoy ilang gisaligan sa panginabuhi.

Si Cabando nangayo og pasaylo kanila ug nakaluha pa dihang ang usa sa mga anak sa napatay nga gwardiya mibasol kaniya sa gidangatan sa ilang kinabuhi karon.  (BANAT NEWS)