C-5 Quirino Flyover pinagigiba para sa LRT-1 Cavite Extension
MANILA, Philippines — Nanawagan si Las Piñas Rep. Mark Anthony Santos sa Department of Public Works and Highways (DPWH) na gibain na ang bahaging humaharang ng C-5 Quirino Flyover upang mapabilis ang matagal nang naaantalang LRT-1 Cavite Extension Project.
Ayon kay Santos, ang flyover ang isa sa pangunahing hadlang sa pagpapatuloy ng Phase 2 ng proyekto, na sasaklaw sa mga istasyon ng Las Piñas at Zapote. Aniya, ang hindi pa nareresolbang isyu sa right-of-way ang patuloy na nagpapabalam sa konstraksyon.
Binigyang-diin ng kongresista na dapat tularan ang ginawang pagbuwag sa Tandang Sora Flyover noong 2019 upang bigyang-daan ang MRT-7, sa halip na baguhin ang disenyo ng proyekto.
“Giniba ng pamahalaan ang Tandang Sora Flyover upang bigyang-daan ang MRT-7. Dapat ding gawin ito sa C-5 Quirino Flyover kung ito ang kinakailangan upang matapos ang LRT-1 Cavite Extension Project,” ani Santos.
Sinabi pa ng mambabatas na ipinaalam na niya kay DPWH Secretary Vince Dizon na ang C-5 Quirino Flyover ang pangunahing dahilan ng pagbabago sa naaprubahang 2022 alignment ng LRT-1 Cavite Extension Project.
- Latest
