PCG, pinalayas ang Chinese research ship malapit sa Batanes

MANILA, Philippines -  Isang patrol vessel at isang aircraft ang dineploy  ng Philippine Coast Guard (PCG) nitong Huwebes upang itaboy ang isang Chinese research vessel, na hinalang nagsasagawa ng hindi otori­sadong marine scientific research sa karagatang sakop ng Itbayat, Batanes.

Ayon kay PCG spokesperson for the West Philippine Sea (WPS) Rear Admiral Jay Tarriela, ang Jia Hai Ke 7 ay nagsasagawa ng unauthorized marine scientific research sa loob ng exclusive economic zone (EEZ) ng Pilipinas ng walang pahintulot.

Sinabi ni Tarriela na ang Jia Hai Ke 7 ay nag-o-operate sa karagatan, may 37 nautical miles hilagang kanluran ng Itba­yat, simula pa nang makumpirma ng PCG ang presensiya nito noong Setyembre 28.

Ani Tarriela, dakong alas-7:55 ng umaga nang lapitan ng BRP Teresa Magbanua ang barko ng hanggang nasa 100 yarda ang layo at nag-deploy ng isang rigid-hull inflatable boat (RHIB), na nagpaikot-ikot sa Chinese vessel.

Paulit-ulit din umanong nagmaniobra ang Jia Hai Ke 7 upang iwasan ang mga Philippine units habang patuloy itong pinapadalhan ng radio challenge ng BRP Teresa Magbanua.

Sa kasagsagan ng operasyon, duma­ting din ang China Coast Guard (CCG) vessel 2503 sa lugar at paulit-ulit ding nagpadala ng radio challenges sa BRP Teresa Magbanua.

Kaagad namang binuntutan ng barko ng Pilipinas ang CCG-2503 ng may 1,000 yarda habang pinapanatili ang posisyon malapit sa Chinese research vessel.

Binigyang-diin ni Tarriela na ang pagkasangkot ng isang CCG vessel ay mahalaga dahil ang Jia Hai Ke 7 ay privately owned.

Pasado alas-12:00 ng tanghali ay tuluyan nang umalis ang naturang Chinese research vessel sa lugar.