Grade 10 na-bully, nagbantang mamamaril ng mga estudyante!
Klase sa Batangas City sinuspinde
BATANGAS CITY, Philippines — Agad sinuspinde ang klase sa Batangas City Integrated High School (BCIHS) nitong Lunes, matapos na makatanggap ng pagbabantang mga mensahe na ipinoste online mula umano sa isang estudyante ng Grade 10.
Ayon sa Batangas City Police, nadiskubre ng mga opisyal ng paaralan ang mga naturang mensahe sa opisyal na Facebook page ng Batangas City Integrated High School bandang alas-9:54 ng gabi nitong Linggo, Hunyo 28.
Ang mga post ay nagmula sa isang taong nagpakilalang Grade 10 student na nagbantang babarilin ang mga mag-aaral ng Grade 7, Grade 8, Grade 9, at Grade 10 dahil umano sa naranasang pambu-bully sa kanya.
Hindi pa natutukoy ng mga awtoridad ang nasa likod ng dummy Facebook account na ginamit sa pagpapakalat ng mga pagbabanta.
“Ongoing po ang investigation namin. Gusto lang po naming malaman kung sino ang nagmamay-ari ng dummy account na ‘yan. Sa kasalukuyan, wala naman tayong nakitang danger sa school na pinuntahan namin bukod sa naipadalang threat sa Facebook,” ayon kay Lt. Sharen Ama, Public Information Officer ng Batangas City Police Station.
Bilang pag-iingat, agad na sinuspinde ng pamunuan ng paaralan ang mga klase upang matiyak ang kaligtasan at seguridad ng mga mag-aaral, guro, at iba pang kawani habang isinasagawa ang imbestigasyon.
Sa inilabas na opisyal na abiso, sinabihan ng BCIHS ang mga estudyante, magulang, at mga kawani na huwag munang pumasok o magtungo sa loob ng paaralan habang umiiral ang suspensiyon ng klase.
Pinayuhan din ang mga estudyante, magulang, at kawani na manatiling kalmado, iwasang magpakalat ng hindi beripikadong impormasyon, at umasa lamang sa mga opisyal na anunsiyo na inilalabas sa mga opisyal na communication channels ng paaralan.
- Latest
