Makig-ipon ang boyfriend

Dear Tito Miguel ,

Maayong adlaw, ako  diay si Michelle. Nagsulat ko kay naa koy problema sa akong usa ka tuig na nga boyfriend nga si Mark

Gusto na ni Mark nga mag-live-in mi. Apan  sa tinuod lang, dili pa ko andam ana nga setup. Mao nga imbis tubagon nako siya, akong gibalewala ang iyang mga isulti  ug usahay dili na lang ko motubag kung hisgutan niya ang kalabot sa  pag-live-in.

Karon, nasakitan si Mark ug sige siya og pangutana kung gihigugma ba gyud nako siya. Alang  niya, kung tinuod daw akong gugma, nganong dili man ko mosugot nga magpuyo mi sa usa ka balay?

Puros nami naay work , apan dili pa gyud ko ganahan mosulod sa maong butang .

Sige siya og pamugos apan dedma ra gyud ko if maghisgot siya niini. Naa man gud ko’y mga kaila   nga nag-ipon apan nagbulag ra gihapon .  Tito Miguel , unsaon nako siya pagpasabot nga dili siya malain?  — Michelle

* * *

Michelle,

MAs  malain siya kun dili nimo tubagon iyang pangutana. Ayaw ibalewala, labi na’g seryoso siya. Klaroha, unsa imong rason. Ipasalig nga ikaw nahigugma kaniya, apan dili pa lang ka andam mag-ipon mo.

Wala ka maghisgot kun duna na ba’y nahitabo kaninyo. Kun duna na, maglisod siya’g sabot ngano sa pag-ipon dili ka mosugot. Pero’g wala pa, tingali mas  makasabot pa siya, nga dili nimo ihatag imong pagkababaye niya tungod kay hadlok ka mawala ra gihapon siya.

Pero gawas sa imong kahadlok nga magbuwag ra gihapon mo, unsa pa kaha laing  rason? Kun imo ingnon unsa may  dalian, puwede sab siya moingon unsa may  dugayan nga puro na man kaha mo nanarbaho ? Ang tinuod, uyab, nag-ipon o kasado man, duna gihapoy purohan nga magkabuwag mo. Ang relasyon sugal, walay kasigurohan ang tanan. Dili kaha ikaw mismo dili pa sigurado sa imong kaugalingon kun siya ba ang imong kaugmaon?

Suwayi’g piyong sa imong mga mata samtang hilom ang palibot ug naghigda ka nga ikaw ra usa, makita ba nimo imong kaugalingon magmugna’g pamilya kuyog niya? Makita ba nimo nga malipayon ka kuyog mong  duha hangtod matiguwang mo? Kay  kun dili, wala ka mahadlok magbuwag mo, nahadlok ka sa imong kaugalingon kay ikaw mismo ang dili sigurado. Tinuod, dili ka mapugos sa butang nga dili pa ka andam. Pero di gyud ka maandam kun sa sugod pa lang wala ka maghinam -hinam.  —Tito Miguel-

Magpatambag ka? Ipada kang Tito Miguel: 0991-318-9366