Nagdala og negative vibes

Dear Tito Miguel,

Maayong adlaw Tito Miguel. Ako diay si Caroline nga taga Carcar City, Cebu. Naa koy usa ka suod nga higala nga si Michelle nga pirmi nakong kauban, pero sa kadugayan, nabantayan nako nga kapoy na kaayo iyang batasan. Pirme siya nga negatibo sa tanang butang. Kung naa siyay istorya, kasagaran puro reklamo, kusog kaayo mo-judge, ug kusog manglibak . Dili ko ganahan nga maminaw pirmi og mga istorya nga puro panlibak ug tsismis. Usahay, makabantay ko nga kung naa mi sa uban, iyang hisgutan ang mga sayop o personal nga kinabuhi sa laing tawo. Nabalaka ko kay basin matakdan ko sa iyang batasan ug mahimong hunahunaon sa uban nga pareho mi.

Gisultihan na nako siya nga dili maayo nga mamantay sa laing kinabuhi, pero murag dili siya maminaw.

Unsa kaha ang sakto nakong buhaton, Tito Miguel?

Kinahanglan ba nako nga distansyahan siya aron mapanalipdan akong kaugalingong kalinaw? Makaguba gyud sa adlaw ang mga tawong dunay negative vibes. — Caroline

* * *

Caroline,

Oo, distansiya na. Gawas nga toxic ug magdala la’g negative vibes, sigurado nga libakon sab ka niya sa uban. Wala siya’y pili, wala siya’y pasaylo, puro lang negative iyang makita sa mga tawo. Una nimong buhaton, ayaw na’g imbitara nga manglaag mong duha. Kay kun imo nang buhaton, mora ra ka’g nikuha’g martilyo ipukpok sa imong ulo. Kun siya makiglaag, balibari. Diha lang ka mosugot kun grupo mo, dili lang kamo duha. Arang-arang sa grupo ka’y daghan mo, sayon ra nimo paglikay kun manglibak na siya’g manaot sa uban.

Ayaw’g tubay, pasagdi imong uban nga higala motubag niya. Basin diay ganahan sab sila maminaw sa iyang libak ug mga reklamo sa kinabuhi. Ayaw’g tapad niya. Samtang manglibak siya nga nagtapok mo, lakaw kadiyot palayo. Kun ini’g balik nimo nanglibak gihapon, gamita lang imong cell phone nga daw wa ka’y nadunggan. O dili ba kaha magsugod ka’g laing topic sa imong tapad.

Kun makamatikod ngano di na ka mokuyog niya nga kamo ra duha, ingna lang ma’s alegre kun daghan mo. Kun magduda nga naglikay ka niya, pasagdi. Mahimo gani nimo angkonon aron klarohay mo. Kun mangluod, pasagdi. Dili pa ka ana siya na mismo nipalayo gikan nimo. Di ka angay anugnan niya. Dili man siya tinuod nga higala. Kun sa atubangan nimo manglibak siya sa uban, sigurado ikaw sunod ini’g talikod nimo. — Tito Miguel

Magpatambag ka? Ipada kang Tito Miguel: 0991-318-9366