Kalinaw sa gugma

CEBU, Philippines — Malipayon karon si Maxene Magalona sa iyang bag-ong relasyon uban sa DJ ug videographer nga si Geoff Gonzalez .Sa iyang Instagram post, gitawag ni Maxene si Geoff nga iyang “partner” ug gipasalamatan kini sa paghatag kaniya og matinud-anon, kalinaw ug klarong panghunahuna.

House Tour

Gihatagan ni Alex Gonzaga og mas duol nga pagtan-aw ang iyang  subscribers sa iyang bag-ong balay sa usa ka house tour vlog sa iyang YouTube channel  niadtong Domingo. Gibutyag ni Alex nga lima ka tuig nga gihimo ang maong balay isip dugang proyekto nila sa iyang bana nga si Mikee Morada .

Nanghakot og mga nominasyon

Gipahibalo na sa PMPC Star Awards for Music ang mga nominado alang sa ika-17 nga edisyon niini, diin  si TJ Monterde ang nag-una uban sa walo ka nominasyon og gisundan sa  SB19 nga nakakuha og pito ka nominasyon  ug ang BINI nga adunay unom. Ipahibalo ang mga mananaog sa 17th PMPC Star Awards for Music karong Hunyo 25 sa Teatrino Promenade sa San Juan City.

Mga kandidata sa Queen of Cebu City 2026, gianunsyo  na!

Opisyal nang gipaila sa Cebu City Government ang 19 ka kandidata  sa Queen of Cebu City 2026 atol sa media press conference sa Cebu City Hall kagahapon ,  Hunyo 1.

Ang mga kandidata mao sila Billy Chavez, Eloisa Quijano, Julia Villaro, Pete Niña Dacayana, Chelsea Heart, Trixie Gabuya Campaner, Scarlet Katyanna Aunzo Viagedor, Jeb Peralta, Paula Panugan, Alexandra Dy, Maegan Marie Castillo, Vanessa Tapitan Regalado, Thania Marie Madrigal, Ivy Nicole, Chezca Marie Ruiz, Jhanela Medalle, Christine Julian Estrella, Carlish Ocampo ug Alexandra Jane Caadan.

Mopresentar kini  sa  pageant stage   alang sa  sektor sa LGBTQIA+ community sa Sugbo, ug maghatag kini og  plataporma ug maayong tumong sa ilang komunidad.

Suma  ni Kenneth A. Rafols, Executive Director sa Cebu City Anti-Discrimination Commission, usa sa mga tumong sa maong patimpalad mao ang paghatag og oportunidad sa mga miyembro sa LGBTQIA+ community nga wala pa makabaton og higayon nga makadaog og korona sa ubang mga pageant.

Kini  kabahin usab sa pagpalig-on sa kampanya batok sa diskriminasyon ug sa pagpasiugda sa adbokasiya sa LGBTQIA+ community sa dakbayan.

Gipasabot  usab  ni Karla Supersoft, pageant director sa programa, nga gibanhaw ug gi-rebrand ang Queen of Cebu City ubos sa administrasyon ni Mayor Nestor Archival.

Ang coronation night sa Queen of Cebu City 2026  kay mahitabo karong Hunyo 27, alas 8 sa gabii sa Plaza Independencia. —Grezy Mie Sibay