Nahasol sa ex

Dear Tito Miguel,

Maayong adlaw  kanimo ug sa tanan nimong readers . Tawga lang ko  sa ngalan nga Jay, 25 anyos, taga Cordova,  Cebu.

Nangayo ko’g tambag kay naglibog na gyud ko sa akong sitwasyon karon. Dugay na mi nagbuwag sa akong ex-girlfriend nga si Ria, mga ten months na. Ug klaro man unta sa among duha nga  naputol  na gyud ang among relasyon. Apan  hangtod karon, siya gihapon ang nagpakaylap nga kami pa kuno gihapon.

Tungod ani, naglisod ko’g duol sa babaye  nga akong maganahan. Naay mga higayon nga gusto na unta ko  mosulod  og bag-ong relasyon, apan kalit lang misulod  akong ex, mikontak sa babaye , ug nangangkon nga kami pa. Mao nga mawad-an na lang og gana ang babaye nga mo-entertain nako kay dili gusto og samok.

Wala na gyud koy pagbati alang sa akong ex.Gusto na ko mo-move forward sa akong kinabuhi. Apan dili ko niya buhian, ug naapektuhan na gyud akong personal nga kinabuhi ug kumpiyansa sa kaugalingon.

Unsaon nako pag-establisar og klaro nga boundaries sa akong ex? Ug unsaon nako pagpakita sa uban nga single na gyud ko ug ready na magsugod og balik? -Jay-

* * *

Jay,

Pasagdi siya kun padayon nga mangangkon nga kamo pa. Aron mapamatud-an nimo sa imong panguyaban nga single na ka, kani ang buhata. Mahimo nimo i-private message imong ex, ingna nga wala na’y kamo, manghinaut ka nga maka move on na siya, ka’y ikaw dugay na.

Kun mokumpirma, wala na’y problema. Kun molimod gihapon o dili ba kaha mangamuyo nga mag-uli mo, tubaga ka usa pa, ingna pasensiya na apan para nimo wala na’y kamo ug wala na’y angay balikan pa. Diha ra taman, pasagdi na siya kun mosumpay pa.  Gamita nga resibo inyong convo, ipakita sa imong sunod nga panguyaban aron pagmatuod nga libre na ka.

Mahimo sab ka mag post sa social media, ingna single and ready to mingle na ka. Ayaw lang siya hinganli. Dili na kinahanglan. Sa maong paagi, tanan nakaila ninyo makahibawo nga wala na’y kamo.

Mas bug-at ni nga ebidensiya nga ipakita nimo sa imong panguyaban. Ayaw na’g tubag sa mga comments sa imong social media friends kay motaas ang istorya. Private message puwede pa. Ang importante naa na ka’y resibo.

Sa maong paagi maulaw na imong ex mangangkon nimo. Makasabot ug makumbinsi na sab siya nga desidido na ka mobiya ug nibiya sa kagahapon ninyo. Kun magsinamok gihapon, pasagdi. Maski mag unsa pa siya, klaro na ang ebidensiya. -- Tito Miguel

- Magpatambag ka? Ipada kang Tito Miguel: 0991-318-9366