Mapul-an dayon sa trabaho

Dear Tito Miguel,

Ako diay si Stanly, 35 anyos, taga Moalboal, Cebu. Nagsulat ko kay gusto ko mangayo og tambag bahin sa akong uyab nga si Cassandra .

Sweet   man siya, apan  usa ka butang nga pirmi namong gikalalisan mao ang iyang pagkamubo og pasensya, labi na sa trabaho.

Sa matag trabaho nga iyang sudlan, dili siya magdugay kay dali ra siya mapul-an o masuko sa iyang kauban o sa sistema. Resulta ani, sige siya’g balhin-balhin og trabaho. Isip  iyang uyab, gusto ko mosuporta ug mosabot niya. Apan  usahay, kapoy na pud kaayo kay murag walay stability among future kung ing-ani pirme. Nagoul  ko nga basin maglisod mi kung magpadayon ni, labi na kung magplano nami sa mas seryoso nga butang sama sa pagminyo. Gisultihan na nako siya nga kinahanglan niya magpabilin ug mag-antos gamay, pero usahay masuko siya ug moingon nga dili daw nako siya masabtan. Dili ko gusto nga mag-away mi, apan dili pud nako malikayan nga maghunahuna sa among kaugmaon. Sa higayon baya nga magminyo na mi, dapat baya nga kaming  duha ang naay trabaho, dili lang kay ako ra. Unsaon nako pagtabang niya nga mahimong mas lig-on ug pasensyosa?

Daghang salamat Tito Miguel.— Stanly

* * *

Stanly,

Lisod usbon ang natural niya. Lain lain ang tawo, dunay pasensyoso, dunay ang kaspa dali ra moulbo. Apan ang natural puwede makontrol o mapugngan, labi na’g makapasakit na sa uban. Kun ang rason nga sige siya’g balhin balhi’g trabaho ka’y dali ra siya mapul-an o masuko sa kauban o sistema, ingna nga dili siya angay manarbaho kay sigurado gyud dili tanan niya gusto matuman. Kun gusto siya magbuot, dapat siya ang boss o tag-iya sa kumpanya o negosyo ba kaha. Kun wala siya’y katakos nga mag-negosyo o manag-iya’g kompanya, kinahanglan siya mopauyon sa uban. Ka’y maski asa o kanus-a, duna gyud siya’y dili mauyonan. Karon, kun iya ni gamiton nga rason aron moundang, wala siya’y padulngan. Ipaamgo kaniya nga kun tanan kompanya nga iyang gitrabahoan duna siya’y reklamo, lagmit siya ang problema, dili ang opisina o kompanya. Ingna nga dili sa tanan higayon siya ang angay sabton. Kun dili maminaw ug mo-insistir, selfish siya.

Kun ginagmay nga bikil masuko dayon siya, kani ang buhata – suwayi’g i-video siya sa tago kun mahutda’g pasensiya’g masuko na. Kun maulian na, ipakita kaniya ang video aron makita niya iyang kaugalingong binuhatan ug batasan. Sa maomg paagi makaamgo siya unsa kamubo iyang pasensiya. Sigurado hasta siya ngil-aran sa iyang binuhatan. Usahay ang tawo dili makakita sa iyang kaugalingon, maski manamin pa siya. Pero’g wala’y kausaban, angay na ka magduha-duha. Mubo siya’g pasensiya nga uyab pa mo, unsa na lang kaha’g kasado na mo?   -Tito Miguel- Magpatambag ka? Ipada kang Tito Miguel: 0991-318-9366