Temptasyon sa ex-GF

Dear Tito Miguel,

Ako diay si MJ, taga Barangay Hipodromo, Cebu City. Taod -taod na diay mi sa akong uyab nga si Charice Mae nga taga Barangay Guadalupe, Cebu City. Daghan nami og mga plano alang sa among kaugmaon. Apan dunay kalit nga kakulian, adunay usa ka butang nga kalit lang nibalik sa akong kinabuhi, ug kini mao ang akong kanhi uyab nga si  Sandy. Bag-o lang mi nagkakita pag-usab sa akong ex, ug didto nako nabati nga mura’g nibalik ang akong pagbati para niya.

Nagkakita mi sa birthday party sa among common friend . Na-timing pud nga wala namo  gidala sa maong party ang  tagsa-tagsa namo nga mga uyab, busa nagkaistorya gyud mi og maayo. Yes, susama mi nga duna na’y uyab.

Hangtod karon, murag naa gihapon koy feelings nga wala pa gyud nawala. Tungod ani, naglibog ko ug naka-feel  ko og konsensya sa akong uyab karon. Dili nako gusto nga pasakitan siya, kay wala man siyay nabuhat nga sayop sa akoa. Pero sa tinuod lang, murag dili na pud ko tinuod nga malipayon kung ipadayon pa nako ang among relasyon samtang naa koy lain nga gihuna-huna. Samtang ang akong ex-girlfriend nga si Sandy kay andam ra pud nga mag-char char mi og balik.

Naa ka’y tips sa paglikay sa temptasyon? - MJ-

* * *

MJ,

Aron ka makalikay sa panuway, ayaw’g paduol, ayaw’g paminaw ug ayaw’g tan-aw. Kun magpaduol ka sa kalayo, diha magsugod nga makabati ka’g kalami ka’y init init pa, hangtod nga mapaso, masunog ug maugdaw ka. Mora ra gud na’g shopping, kun wala ka’y nakit-an, wala ka’y kaibgan. Busa ayaw na la’g sulod sa mall o sa tindahan. Ang temptasyon lami gyud na tan-awon ug paminawon, pero dili ka makamatngon gisuyop na ka hangtod nga mawagtangan ka’g kabuot. Pero sa uwahi magbasol ra gihapon ka ka’y duna ka’y napasakitan, apil pa ang imong kaugalingon mismo.

Kun gusto ka molikay sa imong ex, putla na dayon tanan ninyong komunikasyon, block ug delete na dayon. Kay kun duna ka’y buslot nga maagian padulong niya, sigurado molusot ka’g moipsot ngadto niya. Pero imong problema ka’y dili na ka malipayon sa imong uyab karon, lagmit tungod ka’y nibalik imong kagahapon.

Aron ka makahibawo kinsa o unsa gyud imong gusto, ingna imong ex nga buwagan ninyo inyong mga uyab karon aron libre na mo sa inyong gusto buhaton.

Kun dili siya andam ug tagana, dili nimo angay buwagan imong uyab para niya. Basin char-char ra gyud taman iyang gusto. Pero’g desidido siya mobuwag para kanimo, angay ka magduha duha, kun iya na buhaton sa iyang uyab karon, lagmit buhaton sab niya kanimo sa umaabot. Sa laktod, dili siya angay seryosohon. Unsat tuod rason nagkabuwag mo sa una? Hinumdomi kuno, basin magtuyok tuyok ra mo.  -- Tito Miguel

Magpatambag ka? Ipada kang Tito Miguel: 0991-318-9366