Daginot

Aron makadaginot sa gasto sa operasyon, gipatuman sa kagamhanan ang 4-day workweek. Buot ipasabot nga upat ka adlaw nalang moreport sa trabaho ang mga kawani sa gobyerno inay nga lima ka adlaw.

Tuyo niini aron makadaginot sa kuryente ug gasolina ang mga opisina sa gobyerno taliwa sa krisis sa Middle East nga nakaapekto sa presyo sa mga produktong petrolyo. Ang kamanduan gihimo ni Presidente Ferdinand Marcos Jr. nga dali sab nga gisunod sa ubang mga local government units.

Ang lalawigan sa Sugbo, pinaagi sa usa ka executive order nga giluwatan ni Gobernador Pamela Baricuatro, misagop na sugod niining semanaha sa 4-day workweek. Ang ubang mga LGUs hinuon mihimo pa og pagtuon kun mouban ba sa pagpatuman sa maong sistema.

Alang sa mga nagtuo nga alkansi ang publiko sa maong sistema tungod kay way iban ang sweldo sa mga kawani sa gobyerno bisan upat ka adlaw nalang ilang trabaho, nasayop mo. Way naalkansi sa maong sistema tungod kay gilugwayan ang oras sa trabaho sa mga kawani aron pagtapar sa walo ka oras alang sa adlaw’ng Biyernes.

Sa ato pa inay gikan ra sa alas 8 sa buntag hangtod sa alas 5 sa hapon ang naandan nga opisina sa gobyerno, lugwayan ni hangtod sa alas 7 sa gabii aron motakdo gihapon sa gidaghanon sa oras sa trabaho sa mga kawani sa gobyerno sigun sa gilatid sa Civil Service Commission.

Ang maong sistema makatabang ni sa mga kawani nga makadaginot sab sa ilang gasto sa pletihan matag-adlaw. Alang hinuon nako, kun gusto gyud ang kagamhanan ang makadaginot, angayang hunongon na sa mga dagkong opisyal sa kagamhanan ang mga byahe nga wala gyud kinahanglana.

Angayan sab nga higpit na nga ipatuman ang lagda sa pagdili sa mga dagkong opisyal sa gobyerno nga mogamit og mga luxury vehicles tungod kay labihan niini ka kusog molala og gasolina ug krudo. Duna na man untay lagda niini apan daghan pa sa mga opisyal sa kagamhanan ang wala gyud mosubay.

Daghan pa gihapon sa atong mga opisyal sa kagamhanan, labi pa mga nasudnong opisyal, ang nagsakay og mga luho nga sakyanan nga gigastohan sa buhis sa katawhan.

Laing paagi aron makadaginot ang kagamhanan mao ang paghunong na sa practice nga himoong bayad sa suporta sa eleksiyon ang paghatag og trabaho bisan wala kinahanglana. Dagahan ni sa mga LGUs nga bisan way trabaho sweldado isip mga job order ang mga supporter sa mga politiko. Duna pay uban nga “ghost employee” gyud, mokobra lang og sweldo apan dili moreport sa trabaho.

Ang ubang politiko hasta ang ilang katabang sa panimay gobyerno maoy nagsweldo. Ang uban nalambigit pa og payroll padding, dagko ang sweldo pero gamay ray aktwal nga madawat kay ang opisyal mipatong og komisyon.