Nangigi nga higala

Dear Tito Miguel,

Ako diay si Kurt, 24 anyos, ug gusto ko mangayo og tambag bahin sa akong suod nga higala nga murag sobra ka-territorial.

Dugay na mi nga mag-amigo sa akong higala nga si Malbert, sukad high school pa. Dako kaayo ko’g pasalamat kay daghan mi’g naagian ug siya gyud ang kuyog nako sa kalipay ug kasakit. Samtang nagkadugay, nabantayan nako nga murag dili siya ganahan nga mouban ko og laing barkada o makigsoud sa uban.

Pananglitan, kung naa ko’y bag-ong amigo sa trabaho o sa among grupo, magsige siya’g pangutana kung kinsa to, unsa among giistoryahan, ug nganong wala ko niya giapil. Usahay maglagot siya o dili motingog kung makakita siya nga nag-enjoy ko uban nako nga friends. Murag dili na healthy ang iyang pagka-territorial.

Unsa man ang angay nakong buhaton? Istoryahon ba nako siya og prangka bahin sa akong gibati bisan masuko siya? O magpadayon nalang ko’g sabot ug adjust aron malikayan ang gubot? Unsaon man pag-set og boundaries nga dili makadaot sa among dugay na nga panaghigalaay? — Kurt

* * *

Kurt,

Taas ug lawom na man ang inyong pinagsamahan, sumpay sa tinai ang inyong koneksyon sa usa’g usa, mahimo nimo siya istoryahon nga dili na ka komportable sa iyang pagka-territorial o possessive. Pero kun hadlok ka malain siya, ipaagi’g binuang. Ingna ngano gud tawon mangigi ka, uyab diay ta? Paniid sa reaksyon, kun mokatawa, ingna klaroha ka’y kun mao na imong gusto, pakasli na lang ko aron di na ko moadto sa lain. Kun magkinataw-anay ra mo, mao na’y gamita nga ipakgang kaniya kun mangigi sa imong uban nga higala. Gaan ra, gipaagi nimo’g binuang pero duna’y nagpahipi nga unod ug palaman.

Kun mora siya’g masilo, klaroha, ingna bitaw bai, unsa diay mga lagda sa atong panaghihala? Unsay puwede nako buhaton o dili puwede?

Sa mao’ng paagi magkabuang siya’g panagang. Siya mismo makaamgo nilapas na diay siya sa boundary. Kun mo-ingon dili siya ganahan mabiyaan, nga kinahanglan kuyog siya sa tanan, ingna nga dili na nimo mahatag niya, ka’y mata’g karon ug unya duna gyud ka’y laing mga higala, bag-o man o karaan na. Kun mangluod, pasagdi.

Apan pabilin nga higala nga mora la’g wa’y nahitabo. Imbitara kun kanus-a nimo gusto. Kun mobalibad, pasagdi lang, ayaw pangutan-a ngano. Mao na’y imong gipangita di ba, ang mahatagan ka’g space gawas niya, busa ayaw na’g am-am niya. Dako na man siya, pasagdi lang. Kay kun dili nimo klarohon, magsige lang ka’g tag-an unsa iyang gusto. Hunahunaa kuno, unsa na lang kaha’g makauyab ka’g maminyo na, basin mobalibad pa siya. — Tito Miguel

Magpatambag ka? Ipada kang Tito Miguel: 0991-318-9366