Gisamokan sa ex-BF

Dear Tito Miguel,

Ako diay si Jeramie Rej, taga Argao, Cebu. Naglagot ko sa akong ex-boyfriend nga si Christian kay kanunay siya magparamdam nako basta magkaproblema sila sa iyang girlfriend nga si Danica Ella. Kahibalo sad si Christian nga naa na pud ko'y uyab, maong saputon ko basta magparamdam siya nako. Gusto tingale niya nga magkinabitay mi. Yes, makakontak gihapon siya nako, kay makigamit man siya sa account sa messenger sa among barkada. Akoy na-stress niya, unsay pagtoo niya nako, dali ra madala? Ako na siya giprangkahan nga dili gyud ko madala niya, pero dili gyud ko niya lung-an uy. Unsa ang angayan nakong buhaton? Dili sad malikayan nga magkaabot mi sa pipila ka okasyon kay daghan man gud mi og common friends. — Jeramie Rej

* * *

Jeramie Rej,

Ayaw’g tubaga, ayaw’g tagda hangtod maluya, maski kang kinsa pa’ng account ang gamiton niya. Ka’y kun imo na tubagon, balibaran o awayon, mao ra gihapon, kay mao na iya gustong kuhaon, ang imong atensyon.Kun imong tagdon, motaas ang istorya, apan wala’y padulngan.

Ang iyang gibuhat insulto sa imong pagkatawo. Laliman ka’g magparamdam lang kun duna siya’y problema sa iyang uyab. Buot pasabot gihimo ka niya nga kalingawan. Diha ra ka mahinumduman kun problemado sila, unya kalimtan kun malipayon sila. Pero ayaw na ingna nga nainsulto ka, Kay maski unsa imong isulti, kaniya dili importante, basta lang makuha niya imong oras ug atensyon.

Kun pursigido gihapon ug mahasol gyud ka, badlonga inyong mga common friends nga dili ipahuwam ilan cell phone niya ka’y magsamok samok kanimo. Ingna kun ila sugtan balik, hasta sila imong i-block. Ang tinuod nga higala dili motugot nga mahimong instrumento nga binuangan ka. Kun siya mismo mangita’g laing paagi, hulgaa nga imong isumbong sa iyang uyab ang ginabuhat niini diha kanimo kun mag-away sila. Syaro’g dili mahadlok. Kun dili mopatuo, tinud-a. — Tito Miguel

Magpatambag ka? Ipada kang Tito Miguel: 0991-318-9366