Nabalaka sa kaugmaon sa relasyon

Dear Tito Miguel,

Maayong adlaw diha kaninyo. Tawga lang ko sa ngalan nga Banban. Dugay nami sa akong girlfriend nga si Jepay nga buotan kaayo, responsable, ug supportive sa tanan nakong buhaton. Wala koy ikasaway sa iyang batasan. Ang problema lang, atheist siya, samtang ako kay gadako sa relihiyosong pamilya.

Usahay, dili mi magkasinabot kun hisgutan na gani ang mga butang bahin sa pagtoo, simbahan, ug sa kaugmaon sa among relasyon. Dili man siya bastos sa akong pagtoo, pero klaro kaayo nga lahi gyud among panan-aw. Naa koy kahadlok nga sa umaabot, basin mahimong dako ni nga problema labi na kung hisgutan na ang pamilya, kasal, ug pagpadako sa umaabot namo nga mga anak.

Angay ba nga ipadayon gihapon ang among relasyon bisan lahi mi’g pagtoo, o mas maayo nga hunahunaon na daan ang posibleng komplikasyon sa umaabot nga panahon ? Ganahan ko niya, pero ganahan sad ko nga magpabilin ang akong pagtoo. — Banban

* * *

Banban,

Ikaw mismo nagpamatuod nga wala ka’y ikasaway sa iyang batasan. Mao na’y importante, ang kaligdong ug katarong sa pagkatawo, dili ang iyang pagtoo. Kadaghang relihiyoso ug diosnon, apan ang batasan dili makaon.

Aron dili mo magsumpaki, ayaw hisgoti ang relihiyon. Wala na’y kasulbaran ug kataposan ka’y wala’y konkreto nga ebidensiya nga gibasehan, kun dili sa pagdawat o pagtoo lamang. Motuo ka’g Ginoo apan wala ka’y ebidensiya nga naay labing makagagahom. Sama ra sab niya nga wala’y ikapamatuod nga wala’y Ginoo. Pareho ra mong duha, higot sa pagtoo nga duna o wala, apan walay ebidensiya nga ikapakita. Dili kinahanglan usbon inyong tinuohan. Ang importante gihigugma ninyo’g girespeto ang usa’g usa. Kun ganahan ka magpabilin sa imong pagtoo, pabilin. Wala man ka niya usba o agniha. Ikaw mismo niingon wala niya gi-bastos imong relihiyon.

Kun hadlok ka magsumpaki mo asa pakasal, kamo ra duha makahukom. Kun dili siya gusto sa simbahan, una’g pakasal sa huwes o mayor, sunod sa simbahan, aron inyo duha gusto mapagbigyan. Kun hadlok ka nga inyong mga anak mahimo sab nga atheist, sila ang pahukma ini’g sakto na sila sa pangedaron.

Kun gusto ka motoo sila sa Ginoo sama nimo, ipakita nga maayo kang tawo tungod sa imong pagtoo. Dili ka’y igo ra ka mosimba apan ngil-ad imong batasan. Sa laktod, ayaw sukda ang tawo sa pagtoo, apan sa buhat niya mismo. — Tito Miguel

Magpatambag ka? Ipada kang Tito Miguel: 0991-318-9366