Imbitado ang ex

Dear Tito Miguel,

Maayong adlaw, ug hello sa tanang suki sa Banat News. Ako diay si Shantelle Mae. Nagsulat ko karon kay gusto unta ko mangayo og tambag mahitungod sa akong sitwasyon nga hangtod karon naglibog gihapon ko unsaon pag-atubang.

Aduna koy ex-boyfriend nga si Joshua ug dugay nami nagbuwag. Bisan pa man niana, suod gihapon siya sa akong pamilya. Ginadapit gihapon siya sa mga okasyon sama sa mga birthday ug uban pang espesyal nga okasyon sa among pamilya. Kapila na nako giingnan akong pamilya nga dili siya imbitaron, apan dili gihapon sila mopatoo.

Sa akong bahin, lisod kaayo para nako. Naghandom ko nga maka-move on na, pero sa matag higayon nga makita nako siya sa among balay o sa among mga okasyon, murag mobalik tanan nga kasakit ug mga panumduman. Usahay maglibog ko kung ako ba ang angay mo-adjust. Susama gihapon mi nga single, apan hanap na nga magbalik mi kay dili nako siya mapasaylo sa pagbinuang niya sa among relasyon kaniadto. Wala koy gustong gub-on nga relasyon tali niya ug sa akong pamilya, pero gusto sad unta ko nga respetohon ang akong gibati. Gusto ra ko mangayo og tambag kung unsaon nako pag-atubang sa ingon niini nga sitwasyon ug kung unsaon nako pagpadayon sa akong kinabuhi nga malinawon na ang akong kasingkasing. — Shantelle Mae

* * *

Shantelle Mae,

Imo na man kaha gibadlong imong pamilya apan dili mopatoo, pasagdi sila. Basin nakauyon gyud sila sa imong ex busa namasin nga magkauli mo kun ila siya patambongon sa inyong mga okasyon.

Apan kay desidido na man ka nga dili makig-uli niya, kani ang buhata. Ingna imong pamilya kausa pa, nga dili na imbitaron imong ex aron hingpit na ka maka move on. Kun sila mo-insistir, lakaw palayo sa inyong okasyon.

Sa maong paagi sila makaamgo nga seryoso ka. Sila na ang mabutang sa sitwasyon nga kinahanglan sila mopili sa imong ex o nimo mismo. Lagmit ikaw gyud ang pili-on. Pero posible moingon sila nag in-OA lang ka busa ila gihapon patambongon. Ayaw padala sa ilang istorya, tubaga sa imong lihok. Ayaw pakita kun duna moy okasyon unya motambong imong ex.

Syaro’g dili sila makasabot. Syaro’g mas pili-on pa nila imong uyab kaniadto. Pero kun pananglit ila gyud patambongon, lakaw lang gihapon. Ingna sila wala ka’y mahimo kun mas gipalabi nila imong ex nga nipasakit nimo kaysa nimo nga ila unta protektahan sa kasakit ug kasubo. Syaro’g dili matandog. Mahimo sab nimo pakgangon imong ex nga dili na magpakita sa inyong balay maski imbitaron siya kanunay. Kay kun husto pa siya, maulaw na unta siya maski suod siya sa imong pamilya. Gani, dili sila tinuod nga suod, kay ngano gipasakitan man ka niya. Sa laktod, wala siya’y respeto sa mga tawo nga ganahan siya imbitado. — Tito Miguel

Magpatambag ka? Ipada kang Tito Miguel: 0991-318-9366