Nagduda sa hinigugma

Dear Tito Miguel,

Ako diay si Laveña, taga Danao City, Cebu. Nakadungog ko og chika nga dunay laing babaye ang akong uyab nga si Martin. Ako siya gipangutana aron maminaw sa iyang habig, apan gi-deny niya ang maong isyu. Tungod sa nanggawas nga chika, lain na kaayo ang dagan sa akong huna huna. Bisan wala ko'y ebidensya, na-feel nako nga tinoud ang nanggawas nga isyu. Unsa akong buhaton aron masuta nako ang kamatuoran? — Laveña

* * *

Laveña,

Kun gusto ka makahibawo sa kamatuoran, ayaw na siya pangutan-a, kay sigurado na molimod. Ayaw pahibaw-a nga nagduda ka, kay kun tinuod imong nadunggan, magmatngon na siya sa iyang mga lihok, samot ka nga maglisod pangita sa tubag.

Busa kalma lang. Apan paniid. Ayaw paklaro nga imo siya gibantayan. Buhata ang imong naandan pagpangga ug pag-atiman niya. Kay kun iya makita nga wala na ka magduda, diha na mokumpyansa. Siya mismo, sa iyang kadanghag o ang panahon na ang mopadayag sa kamatuoran, kun duna man siya’y gitago-an.

Wala ka kabantay nga kun duna ka’y pangitaon, dili makit-an? Apan ini’g undang nimo’g pangita diha ra mopakita’g iyaha, wala nimo damha o pangitaa? Mao sad na’y buhata. Samtang wala pa’y nitumaw nga ebidensiya, tagamtama lang usa ang unsa’y naa ninyo karon.

Total, duda pa man. Kay kun wala gyud diay, imong gihikawan imong kaugalingon sa kalipay. Imbis malingaw mong duha, sige na hinuon ka’g duda.

Pero kun duna gyud diay unya nasakpan nimo maski wala nimo pangitaa, aw natubag na imong pangutana. Diha na ka manukad unsa’y sunod nimo nga lakang, ang pasayloon ba siya, hataga’g ikaduha nga higayon o biyaan na nimo, ka’y ang tawo nga magbudhi kausa, lagmit mousab pa. — Tito Miguel

Magpatambag ka? Ipada kang Tito Miguel: 0991-318-9366