Uyab nga palahubog

Dear Tito Miguel,

Ako diay si Shanaya, taga Consolacion, Cebu. Upat ka tuig na ang relasyon namo ni Kyle. Ang problema nako karon kay ang batasan ni Kyle kung mahubog. Kusog kaayo mangita og gubot. Ako na siya nga gitambagan nga dili nalang moinom aron dili na siya kakita og away. Sa pagsige nako og tambag, wala gyud siya motuman nako. Actually, karong tuiga ra nagsugod ang iyang pagka-palahubog. Dili baya na siya moinom sauna. Unsa akong buhaton, ako nalang kaha ni siya buwagan? — Shanaya

* * *

Shanaya,

Kun karon tuiga pa siya nag-inom ug naghinubog, basin duna’y lawom nga rason. Basin duna ni siya’y problema o pinagdadaanan ba kaha. Susiha kuno. Diha ka manukad unsaon siya’g tabang o tambag. O basin sab karon pa siya nakatilaw sa mao’ng bisyo, nabag-ohan ug giganahan.

Bisan pa, wala’y katarungan ang mangita’g away ini’g kahubog. Dili man tanan hubog mangita’g away, ang uban mosayaw’g mokanta, mohilak, magyawyaw, mag-iningles o dili ba kaha matulog lang. Tinuod, delikado ang iyang ginabuhat, ka’y kun matayminga’g mopalit ug mopatol niya, basin pa makalas iyang kinabuhi. Apan kay wala man ka magkulang sa pahimangno, tambag o pagdumili, pasagdi na siya. Suwayi kuno’g video niya kun mahubog na’g mangita’g away. Sunod adlaw kun mahuwasan na, patan-awa siya aron siya mismo makaamgo unsa siya kun mawala sa iyang kaugalingon. Ayaw i-post o upload, sa iya lang ipakita.

Basin maulaw na’g mahadlok, dili na mousab. Kun dili, pasagdi. Dako na man siya, dili pa sab mo kasado. Wala man ka magkuwang. Paniid, kun dili mobiya sa bisyo, angay na ka magduha duha kun siya ba ang lalaki nga imong makuyog hangtod sa hangtod. Mahimo sab nimo baharan, nga kun dili mag-usab, imong biyaan. Kun siya motuman, mahimo nimo hataga’g laing higayon. Kun dili, buot pasabot para niya wala ka’y bili. — Tito Miguel

Magpatambag ka? Ipada kang Tito Miguel: 0991-318-9366