Nausab ang batasan

Dear Tito Miguel ,

Maayong adlaw , ako diay si Jessie , taga Mandaue City. Lima ka buwan nami sa akong uyab nga si Asha Jane. Naproblema ko  kay nigawas naman ang iyang tinoud nga batasan uy .

Dali ra kaayo masuko sa ginagmay nga mga butang .  Gusto niya nga siya ang permi masunod. Dili siya ganahan nga mouban ko sa akong barkada kun wala siya . Selosan pud niya ang akong friends nga mga babaye . Masuko siya kun dugay ko ka-reply sa iyang mga chat .

Basta rest day nako sa work, dapat siya ang akong kauban . Grabe gyud ang akong kahibulong, sanglit dili man siya ingon ana sa una. Boutan kaayo na si Asha Jane sa una ,  maong nakalitan ko sa iyang pagka-toxic . —Jessie

* * *

Jessie,

Basin mao gyud na iyang tinuod nga pagkatawo sa sugod pa lang. Iya lang gipahipi ka’y bag-o pa man mo. Sa dihang secure ug kumportable na siya nimo, nigawas na iyang tinuod nga batasan.

Pero unsa may imong gusto, ang mag-usab siya o agwantahon nimo. Siguro naman ni reklamo na ka niya, pero daw wala siya’y nadunggan. Ka’y lagi mao na iyang natural. Para niya wala’y simang sa iyang batasan, busa wala’y angay usbon. Kun tinuod nimo siya nga gihigugma, istoryaha kausa pa. Ikumpara kun unsa siya sa bag-o pa mo ug karon. Ingna gimingaw ka sa kun unsa ug kinsa siya sa sugod pa. Apan karon nakalitan ka sa mga kausaban sa iyang batasan. Lagmit moingon ing ana gyud siya, apan pangutan-a ngano sa sugod pa maayo man siya? Mahimo man lagi diay niya nga dili magpaka toxic. Kun mao gyud na iyang batasan, mahimo man lagi diay nga iya pugngan.

Maayo kun mag-usab. Apan kun dili, angay na ka magduha duha. Mopadayon ba ka sa relasyon nga dili ka kaginhawa, o maagwanta nimo ka’y gihigugma nimo siya. Unsa na lang kaha kun magminyo mo’ng duha, basin daghan pa siya’g tinagoan nga ngil-ad nga batasan, diha na ipabuhagay kun kasado na mo. Pero kun wala ka’y plano pakaslan siya, biya na samtang wala pa ka mahinayak ug masugamak.    —Tito Miguel

Magpatambag ka? Ipada kang Tito Miguel: 0991-318-9366