Rodjun, walang paki sa bashers

Hindi na bago para kay Rodjun Cruz ang makaranas ng online bashing. Madalas na nakararanas ng pamba-bash ang aktor at asawang si Dianne Medina sa social media. Hanggang maaari ay hindi na lamang daw pinapatulan ni Rodjun ang netizens na nagpupukol sa kanila ng mapanirang mga salita.

“Ako po talaga, kami ni Dianne, kinakausap ko siya kasi ang mga bashers, mga inggit ‘yan eh. Wala naman silang ibang ginagawa sa buhay kundi mag-bash, magbaba ng mga tao,” bungad sa amin ni Rodjun sa Fast Talk with Boy Abunda.

May pagkakataon pang naakusahan ang aktor na ang misis umano ang sumusuporta at bumubuhay sa kanilang pamilya. Mas pinipili na lamang daw ni Rodjun na manahimik dahil mas kilala nila ni Dianne ang isa’t isa.

“Alam namin ‘yung totoo, alam namin ‘yung hard work. Tsaka si Dianne din, siyempre nag-start pa lang din siya mag-diet, bina-bash siya about sa weight niya, sa lahat ng ginagawa niya. Pero ‘yung wife ko kasi, sobrang love na love ko siya and na-appreciate ko ‘yung ginagawa niya for the family. And hindi kasi nila alam kung ano ‘yung hirap ng isang nanay, kung ano ‘yung pinagdaraanan ng isang nanay,” paliwanag ng aktor.

Ayon kay Rodjun ay mas minahal niya si Dianne nang magkaroon na sila ng mga anak. Hanga rin ang aktor sa pag-aalaga at pagmamahal na ginagawa ng misis para sa buong pamilya. Limang taong gulang na ang panganay nilang si Rodolfo Joaquin Diego habang isang taong gulang pa lamang ang bunsong si Maria Isabella Elizabeth.

“Ako, mas lalo kong minahal si Dianne no’ng nando’n ako sa hospital no’ng nag-give birth kay Isabella. So nakita ko ‘yung sacrifices niya, ‘yung hirap na pinagdaanan niya, ‘yung ginagawa niya sa family. So sinasabi ko sa kanya, huwag niyang pansinin ‘yung mga negative. Do’n tayo sa positive, at least wala tayo nasasagasaan na kahit na sinong tao. Enjoy natin ‘yung life and sobrang blessed tayo to be stressed. So, enjoy life,” paglalahad ng dating child actor.

Samantala, napapanood si Rodjun tuwing Sabado ng gabi sa Stars on the Floor. Katuwang ng aktor si Dasuri Choi bilang Dance Star Duo na kung minsan ay nagiging senswal ang istilo ng pagsasayaw. Hindi raw kailan man nakaramdam ng selos ang kanyang misis ayon kay Rodjun. “Abangan n’yo kasi grabe, ang dami pa naming gagawin, ang dami pang challenges, ang dami pa naming genre na sasayawin. Guys, napakalupit ng mga pasabog na gagawin namin. Actually, si Dianne sobrang happy ko kasi hindi talaga siya nagseselos. And kapag may ginagawa kaming prod (dance number) ni Dasuri naka-support siya, nire-repost niya. Sobrang happy siya sa ginagawa namin ni Dasuri na dance. Kasi siyempre hindi alam ng lahat si Dianne, magaling din siya na dancer and naiintindihan niya ‘yung ginagawa namin ni Das. Kasi kung wala kaming connection, paano magwo-work ‘yung dance naming dalawa,” pagbabahagi niRodjun.

(Reports from JCC)